~ මකර රජදහන ~

අදත් වෙනද වගේම එකමත් එක දවසක්

2012-01-26T19:35:00.003+05:30

[ 26 - Jan - 2012 ]

මකරෙක්ව අඳින හැටි !

2011-11-27T21:01:00.001+05:30

පහුගිය අවුරුදු තුන පුරා එක එක අය එක එක විදිහට මකරු ඇන්දා.( එක එක විදිහට හිතේ ඇඳගන්නත් ඇති ) මේ ඒවායින් කීපයක්.

සයිබර් යායේ චූටි මහත්තයා අභියෝගතා චිත්‍ර තරඟයේ 9 වැනි ස්ථානය දිනා ගැනීම වෙනුවෙන් බුද්ධි ඇඳපු මකර අධිරාජයා.

පොඩ්ඩිව නරියාගෙන් බේරා ගැනීමේ වීර ක්‍රියාවට ස්තූති කරල සිත්තමී ඇඳපු මකරා.

මගේ 25 වෙනි උපන්දිනයට රුවන්තිකා කුමාරි ඇඳපු මකරා.

මගේ 26 වෙනි උපන්දිනයට රුවන්තිකා කුමාරි ඇඳපු මකරා.

මගේ 27 වෙනි උපන්දිනයට ශසීන්ද්‍ර වීරසිංහ මල්ලියා ඇඳපු මකරා.

මෙන්න මගේ සැබෑ ස්වරූපය

එහෙනම් මම ගිහින් එන්නම්

ආයුබෝවන් !!!

[ 27 - Nov - 2011 ]

කවි හදන හැටි ?

2011-11-25T05:49:00.001+05:30

මුල් පදය නුඹ කියන්

දෙවෙනි පද මම කියමි

එයින් පසු අනිත් අය

ගොඩක් පද හැදුවාවෙ

Mini කවි වල නොපළ කවියකි.

[ 25 - Nov - 2011 ]

හොර පූසෙක් කස තැලුම් කකා ..

2011-11-19T12:48:00.001+05:30

හොර පූසෙක්, කස තැලුම් කකා
දංගෙඩියට ගෙන යන ගමනේ
තඩි මීයෙක් දැක, මස් රස සිහි කර
පුරු පුරු පුරු ගෑවාලු //

අනේ මෙහෙම තණ්හාවක්, අනේ මෙහෙම ආශාවක්
සත්තුනි ලැබේද ඉන් සැනසීමක්

වහු පැටවෙක් පිඹ..ගෙන ආවෝතින්
දෙන්නට වේ යැයි සැක සිතලා
පිදුරු ගොඩේ හිඳ , තඩි බලු දණ්ඩෙක්
බුක් බුක් බුක් ගෑවාලූ //

අනේ මෙහෙම තණ්හාවක්, අනේ මෙහෙම ආශාවක්
සත්තුනි ලැබේද ඉන් සැනසීමක්

ගල් ඉබ්බෙක් ගිරි කුලකින් විසිවී
මහ පොළොවට පාවී එද්දී
අහසින් ගිය ඉබි , පුවතක් සිහි කොට
හිකි හිකි හිකි ගෑවාලු //

අනේ මෙහෙම තණ්හාවක්, අනේ මෙහෙම ආශාවක්
සත්තුනි ලැබේද ඉන් සැනසීමක්

සුනිල් එදිරිසිංහයන් ගායනා කරන "සොර දෙටුවෙක් කස තැලුම් කකා" ගීතය අසමින් සිටිනා අතර සිතේ මතුවූ විකාර සංකල්පනාවකි.

[ 19 - Nov - 2011 ]

සරුංගලේ ?

2011-11-17T08:31:00.001+05:30

නුඹෙ හිත මම අරං............ගියා

ඒක මඟදි හුලඟෙ.............ගියා

හෙට නුඹහට දෙන්න........කියා

අලුත් හිතක් ගෙනෙමි.....මෙමා

Mini කවි වල නොපළ කවියකි.

[ 17 - Nov- 2011 ]

අනපේක්ෂිත ප්‍රශ්නයක්

2011-11-15T13:47:00.001+05:30

මෙම සටහන ලිවීමට උපදෙස් ගැනීම සඳහා දිල්ශාරා වීරසිංහ සොයුරිය සමඟ කළ පෞද්ගලික සංවාදයක් copy paste කර save වෙනුවට අත්වැරදීමක් නිසා publish බොත්තම එබීම නිසා එය ඔබේ feed readers වලට පැමිණ තිබිය හැකිය . ඒ ගැන සමා වන ලෙසත් වැරදි වැටහීම් ඇති කර නොගන්නා ලෙසත් කාරුණිකව ඉල්ලා සිටිමි .

=================================================
.

අදින් දවස් 2කට කලින් නොවැම්බර් 13 ඉරිදා. මහ කම්මැලි දවසක්. කරන්න කිසිම වැඩක් නෑ. උදේට කෑම කෑවා . රෙදි හේදුවා. පොඩ්ඩක් වෙලා ඇඳේ හාන්සි වෙලා හිටියා. නින්ද එන්නෙත් නැති තරමට කම්මැලියි. කරන්න දෙයක් හිතට එන්නෙම නෑ. පාරට බැහැලා ඉබාගාතෙ ඇවිදගෙන ගියා.

ඔහොම ඇවිදගෙන යනකොට යනකොට යනකොට .... මට දුටුවා මම යන පැත්තට විරුද්ධ දෙසට ඇවිදගෙන එන කාන්තාවන් දෙන්නෙක් . ඒ දෙන්නගෙ කියන්න තරම් විශේෂත්වයක්නම් මට මතක නෑ . ඒත් එකිනෙකා පහු කර යන ගමන් අපි අතරෙ පුංචි හිනාවක් හුවමාරු වුණා.

අපි එකිනෙකා පහු කරහෙන යද්දි ඒ දෙන්නා එක්වරම නතර වුණා . මාත් නතර වුණා. ඒ දෙන්නගේ මූණු වල තිබ්බේ උදවුවක් ඉල්ලන පෙනුමක්.

One lady said "Shall I ask a Question ?"

I said "‍Yes,OK" . I was thinking they are trying to ask about a place or road or some thing.

But

.
.
.
.
.
.
She look at me with very serious face and asked

.
.

"What is happiness ?"
.
.
I was in "mm,m,m,m,m,m,m" mode for few seconds , may be 15 seconds

I felt they need some answer other than "I dont know"

.
.
.
I said "Happiness is a state of mind"
.
.
The two ladies smiled at each other like they are thinking that I am an Idiot. I slightly embarrassed due due to the way they reacted for my answer :)
.
.
Then one lady took some book from her bag and opened it and
showed me some paragraph and asked me to read it.

It was some bible kind of book I read it. I cant remember what was there
But there were some phrases about happiness. I was reading it without understanding it much. I was confused what they will do next .

Even after finished reading it, I did not know what to tell next. I just gave a little smile :).
..

.
.

Then they asked Do you like to learn more about happiness

I said "yes".

They gave me a leaflet and said "Our address is there"

Quickly I realized they are belonging to "Jehovah's Witnesses" group.

I said "Thank you" and exit from the scene.

This was a very small unexpected incident last long in few minutes.

But still I was thinking "What is happiness ?"

and now I remember the answer for unexpected question.

සංතුෂ්ටි පරමං ධනං !!!

[ 15 - Nov - 2011 ]

ආචාර වෙඩිමුර 25

2011-11-11T09:25:00.001+05:30

අද 2011 නොවැම්බර් 11. අද පෙරවරු 11.11 ට 11:11:11:11:11:11 වෙනවා.

හැම අවුරුද්දෙම 11.11.11 (නොවැම්බර් 11 පෙරවරු 11.11 ට ) ට ගාලු මුවදොර පිටිය කිට්ටුව නැවක ඉඳන් නාවික හමුදාව කාලතුවක්කු ආචර වෙඩිමුර 25ක් තියනවා.සාමාන්‍යයෙන් පුද්ගලයෙක් වෙනුවෙන් පූර්ණ රාජ්‍ය ගෞරවයකදි තියන්නෙ කාලතුවක්කු වෙඩිමුර 21 යි ( 21 - Gun Salute ). ඒත් 11.11.11 ට 25ක් තියනවා. ඒ කා වෙනුවෙන්ද දන්නවද ?

.
.
.
.
.
.
.
.
.
.
.
.
.
.
.
.
.
.
.

සිංහල දෙමළ මුස්ලිම් බර්ගර් ඇතුලු

සමස්ථ රට ජාතියම වෙනුවෙන් !!!

[ 11 - Nov - 2011 ]

බලු රාලට සනීප නෑ

2011-10-28T18:41:00.001+05:30

චූටි දෝණි පොඩි කාලෙ ඉඳන්ම දෝණිගෙ තනි නොතනියට හිටිය, චූටි දෝණි ගෙදර නැති වෙලාවට චූටි දෝණිගේ චූටි බෝලෙ පෙරල පෙරලා මිදුලෙ හිටිය පුංචි බලුරාලට සනීප නැති වෙලා.

පුංචි බලු රාලට ඇවිදගෙන යන්න සනීප මදි නිසා අම්මි අද බලු රාලව වඩාගෙන බලු දොස්තර මාමා ගාවට එක්ක යාවි.

චූටි දෝණි දැන් ටිකක් ලොකු නිසා අදට විතරක් අම්මිගේ අත අල්ලගෙන පයින් යන්න පුලුවන්.

දොස්තර මාමා බලු රාලට බෙහෙත් දෙන හැටි බලන් ඉඳලා චූටි දෝණිත් ලොකු වුණාම දොස්තර හොඳ හිත වගේ කෙනෙක් වෙන්න ඉගෙන ගන්නවනෙ.

[ 28 - Oct - 2011 ]

ජාතික කුකුළා

2011-10-02T07:35:00.003+05:30

දිල් අක්කා අහුලන්නෙ අතීතයෙන්. අතීතයෙන් අහුල අහුල ඉද්දි එයාට රජ කාලෙ හිටපු රජ කුකුළෙක්ව ඇහිලිලා තිබ්බා . අතීතයේ විතරක් නෙවෙයි වර්තමානෙත් කුකුළන්ට අපේ රටේ හොඳ වැදගත් තැනක් තියෙනවා. අපේ රටේ ජාතික කුකුළා වලි කුකුළෙක් ( ජාතික කුකුළා නෙවෙයි ජාතික කුරුල්ලා තමයි. ඒ වුණාට එකමත් එක බබෙක් පොඩි කාලෙ හැම කුරුල්ලටම කීවෙ කුකුළා කියල . "පුතේ අර ඉන්නෙ මොකෙක්ද ? " කියල කපුටෙක් පෙන්නල ඇහුවත් "කුකූඌඌළා.." කියල තමයි උත්තර දුන්නෙ)

අපේ රටේ අය කුකුළත් අතින් අරන් නැගිටල කලට වෙලාවට වැඩ කරන වලියට බර අය හින්දා වෙන්න ඇති ජාතික කුකුළාට වලි කුකුළෙක්ව තෝරා ගත්තෙ.

කුකුළා ජාතික පක්ෂියා හින්දා අපේ රටේ කුකුල් හොරකම් වෙන්නෙත් නෑ. මේ තියෙන්නෙ වෙන කොහෙදො මන්දා රටක වෙච්ච කුකුල් හොරකමක පින්තූරයක්.

ප.ලි

===

1. වලි කුකුළයි , පොර කුකුළයි කියන්නෙ වර්ග දෙකක්ද ?

[ 02 - Oct - 2011 ]

මම ළමයෝ ....

2011-10-01T22:06:00.001+05:30

එකයි

දෙකයි

මේ ඉන්නේ මම. තණකොලේ අග්ගිස්සෙ එල්ලිලා.

ලෝකෙ ඉන්න ඔක්කොම පොඩ්ඩන්ට , පොඩ්ඩියන්ට

සතුටුදායක ළමා දිනයක් වේවා !

[ 01 - Oct - 2011 ]

වඩු බාසුන්නැහැ

2011-09-28T22:49:00.000+05:30

වඩු බාසුන්නැහැ පුංචිම කාලෙත්....
ලී එක්කයි සෙල්ලම් කෙරුවේ....
ලී කුඩු පටවපු පුංචි කරත්තෙයි....
ඔහු සමඟින් තනියට ආවේ....

ලොකු බාසුන්නැහැ ගෙවල් හදද්දියි...
පුංචි පුංචි ලී එකතු වුණේ...
ඒවා අරගෙන හැඩ වැඩ දමලයි...
සෙල්ලම් ගේ ඇඳ පුටු තැණුනේ...

ඇඳ පුටු කිසිවක් නැති ලී මඩුවෙන්..

ඔහු අද තනිවම යන්න ගියේ..
ලැලි වලින් සැදි පුංචි පෙට්ටියක්..
ඔහු සමගින් යන්නට සිටියේ..

[ 29 - Sep - 2011 ]

අසම සම , ප්‍රති නිර්මාණය

2011-09-22T05:11:00.000+05:30

මහාචාර්ය විස්කම් කැන්ටිමේ පැත්තක වාඩි වෙලා ලොකු කල්පනාවක. මොකක් හරි ලොකු ප්‍රශ්නයක් වෙන්න ඇති. මට හිතුණා ගිහින් කතා කළොත් හොඳයි කියලා. මට සර්ව හම්බ වෙන්න පොඩි ඕනෙ කමකුත් තිබ්බා.

"සර් , බිසීද , සර්ව හම්බ වෙන්න පොඩි උවමනාවකුත් තියෙනවා"

"හ්ම්"

සර් අහක බලාගෙන ආයෙත් කල්පනා කරන්න පටන් ගත්තා. සර්ට තරහ ගියාවත්ද ? විස්කම් සර් එහෙම තරහ යන කෙනෙක්නම් නෙවෙයි. අපි එක්ක හොඳට කතා බහ කරන කෙනෙක්. පොඩ්ඩක් වෙලා බලන් ඉඳලා සර්ගෙන් ප්‍රතිචාරයක් නැති නිසා මම ආපහු යන්න කියලා හැරුණා.

"පොඩ්ඩක් ඔහොම වාඩි වෙන්න, චාණකට පුලුවන්ද මට පොඩි උදවුවක් කරන්න ? පොඩි නෙවෙයි ලොකු උදවුවක් ?"

"ඇයි සර් , සර්ට මොකක්වත් කරදරයක්වත්ද ? පහුගිය සතියෙම සර්ව දැක්කෙත් නෑ ? " මම ඇහුවා.

"නෑ නෑ මට කරදරයක් නෙවෙයි. ඒක මෙහෙම කතා කරන්න බෑ, ඒක ප්ලේන්ටි පහක් විතර බොන ගමන් කියන්න ඕනෙ ලොකු කතාවක්, යමුද අපේ ගෙදර ?"

=======

කාර් එකේ යන තුරුම සර් එක වචනයක්වත් කතා කළේ නෑ. මොකක්ද සර් මගෙන් ඉල්ලන්න යන උදවුව ? විස්කම් සර්ගෙ පරීක්ෂණ ව්‍යාපෘති කීපයකටම සම්බන්ධ වෙලා හිටියත් මීට කලින් මම සර්ගෙ ගෙදරට ගිහින් තිබ්බෙ නෑ. සර්ගෙ නිල නිවාසය තියෙන්නෙත් වැඩිය කවුරුත් නොයන පාලු පැත්තක.

කාර් එක නැවැත්තුවත් සර් කාර් එකෙන් බැස්සෙ නැහැ. සර් බහිනකම් කියා මමත් වාඩි වෙලා බලන් හිටියා.

"චාණකට පුලුවන්ද රහසක් ආරක්ෂා කර ගන්න, මේක ලොකු රහසක්" සර් කියපු විදිහට මට බයත් හිතුණා.

"ඒ කිවුවෙ සර් ? මොන වගේ රහසක්ද ?"

"නෑ නෑ , බය වෙන්න දෙයක් නෑ. මේක මම කරන පරීක්ෂණයක රහස්. සාමාන්‍ය සම්ප්‍රදායක් තියෙනවනෙ පරීක්ෂණයක් ඉවර කරනතුරු ඒවායේ විස්තර පිටට නොදෙන"

"ඔව් සර්, මීට කලින් කරපු පරීක්ෂණ වලත් එහෙමනෙ" මම කීවා.

"මීට කලින් ඒවා වගේ පොඩි පොඩි පරීක්ෂණ නෙවෙයි, මේක ලොකුම ලොකු වැදගත්ම එකක්, මම සෑහෙන කාලයක් තිස්සේ මහන්සි වෙච්ච, අපි යමු"

ඒක සාමාන්‍ය ගෙයක් නෙවෙයි. ගේ ඇතුල එහෙම පිටින්ම විද්‍යාගාරයක් වගේ. පැත්තක පොඩි ඉඩක ඇඳකුයි පුටු හතර පහකුයි තිබ්බා. මට පුටුවක වාඩි වෙන්න කියපු සර් ඉඳ ගත්තෙ ඇඳේ.

"චාණක දන්නව ඇතිනෙ පෘතුවියේ ජීවය ඇති වෙච්ච හැටි, පරිණාමය වෙච්ච හැටි ගැන විවිධ මත තියෙනවා, ඒත් ඒ හැම එකක්ම මතවාද විතරයි . සම්පූර්ණයෙන්ම නිරීක්ෂණය කරන්න බෑ. මම කාලයක් තිස්සේ උත්සාහ කළේ ජීවය ගැන නිරීක්ෂණාත්මක ආකෘතියක් හදන්න"

සර්ගෙ ප්ලේන්ටි පහක් විතර දිග ලොකු විස්තරය පටන් ගත්තෙ එහෙමයි.

=======

සර්ගෙ පරීක්ෂණය විශ්වාස කරන්නත් අමාරු , කවුරුවත්ම නොහිතන විදිහෙ අපූරු එකක් . විස්කම් සර් පෘතුවියක් ප්‍රති නිර්මාණය කරලා . පුංචිම පුංචි පෘතුවියක්. ඇහැට පේන්නෙත් නැති පුංචි පෘතුවියක්.

විකිරණශීලී පරමාණුවක න්‍යාෂ්ටිය තමයි මේ පුංචි පෘතුවියේ සූර්යයා. ඒ පරමාණුව වටේට කරකැවෙන ඉලෙක්ට්‍රෝනයක් උඩ පෘතුවියේ භෞතික තත්ව සියල්ලම ප්‍රතිනිර්මාණය කරලා හිතාගන්නත් අමාරු සෑහෙන සියුම් විදිහට. ජීවයේ මූලික අවස්ථා ඒ ඉලෙක්ට්‍රෝනය උඩ ඇති වෙලා තියෙන හැටි අපි ප්‍රබල අන්වීක්ෂ වලින් නිරීක්ෂණය කළා. සර්ට මගේ උදවු උවමනා වෙලා තිබ්බේ ඒ පෘතුවි ආකෘතිය මත ජීවය පරිණාමය වන හැටි දිගින් දිගටම නිරීක්ෂණය කරන්න උදවු කාරයෙක් විදිහට.

එදා රෑම සර්ගෙ පරීක්ෂණාගාරයේ නතර වෙන්නම් කියා පොරොන්දු වෙලා ආවත් නොහිතපු විදිහට මට තද උණක් හැදුණා.

"කමක් නෑ , සනීප වුණාම එන්න. කොහොමටත් මම දිගටම මේක බලනවා, මම නැති පොඩි පොඩි වෙලාවල් වලට බලා ගන්න කෙනෙකුයි ඕනෙ වෙලා තිබ්බේ" සර් කීවා.

=======

මට උණ හොඳ වෙලා විස්කම් සර්ව හම්බ වෙන්න පුලුවන් වුණේ දවස් 10කට පස්සෙ. සර්ගෙ පරීක්ෂණේ විස්තර දැන ගන්න මම සෑහෙන නොඉවසිල්ලෙන් හිටියෙ.

"පරීක්ෂණය සෑහෙන සාර්ථකයි, මම හිතුවට වඩා බොහොම ඉක්මනට බුද්ධිමත් කියල කියන්න පුලුවන් ජීවීන් හැදුනා, අපි දැනට පිළිගන්න සිද්ධාන්ත ගොඩක් වැරදි බව පෙන්වන්නත් පුලුවන්"

"එතකොට දැන් ඒකෙ මිනිස්සු වගේ බුද්ධිමත් ජීවීන් ඉන්නවද ?" මම පුදුමෙන් ඇහුවා.

"සමහර විට මිනිස්සුන්ටත් වඩා බුද්ධිමත්. මිනිස්සුන්ට වඩා හැඩයෙන්නම් වෙනස්. ඒ අය ඉලෙක්ට්‍රෝනය මත ගොඩනැගිලි වගේ දේවල් පවා හැදුවා. ඒත් දැන් ඒ අය නෑ."

"ඇහ්"

"ඒ අයගෙ ක්‍රියාකාරකම් හින්දා පද්ධතියේ සමතුලිත බව වෙනස් වෙන්න ගත්තා මට පාලනය කර ගන්න අමාරු මට්ටමටම . සෑහෙන ඉක්මනින් ඒ අය ඉලෙක්ට්‍රෝනය වෙනස් කළා. තව ටිකක් වෙලා ගියානම් න්‍යාෂ්ටික පිපිරීමක් වෙන්නත් ඉඩ තිබ්බා ඒ හින්දා .මට ඒ ආකෘතිය විනාශ කරන්න වුණා. ආයෙ අක්කෘතියක් හදනකොට ඒ හැනත් හිතන්න ඕන"

=======

එදා රෑ මම නිදා ගන්නෙත් නැතුව කල්පනා කළේ විස්කම් සර්ගෙ පරීක්ෂණේ ගැන . දවස් 10කින් ඇති වෙලා විනාශ වෙච්ච බුද්ධිමත් ජීවීන් කොයි වගේ වෙන්න ඇත්ද ? අපේ දවස් 10ක් ඒ අයට කොච්චර කාලයක් වෙන්න ඇත්ද ?

යාන්තමින් නින්ද යාගෙන එද්දිම මම හීනෙන් ඔය පල්ලෙහා තියෙන රූප සටහන දැක්කා

ඒ අපි ස්ව-සමානතාව (Self - Similarity) ගැන ඉගෙන ගනිද්දි අපිට පෙන්නපු උදාහරණයක්. එක සමාන කුඩා කුඩා ආකෘති විශාල ගණනක් එක් වෙලා ඒ කුඩා ආකෘති වලටම සමාන විශාල ආකෘති නිර්මාණය වෙන එකටයි ස්ව සමානතාව කියන්නෙ.

පුංචි පුංචි පරමාණු එකතු වෙලයි අපි ජීවත් වෙන පෘතුවිය , සූර්ය ග්‍රහ මණ්ඩලය , විශ්වය හැදිලා තියෙන්නෙ.

දෙවියනේ එතකොට අපි ඉන්නෙත් කවුරු හරි කෙනෙක් නිර්මාණය කරපු ආකෘතියක වෙන්න බැරිද ? පරමාණුවේ න්‍යාෂ්ටිය සූර්යයා. පෘතුවිය සහ අනිත් ග්‍රහලෝක ඉලෙක්ට්‍රෝන.

ඒක එහෙමනම් ? ඒ ආකෘතිය හදපු කෙනාටත් ඒක විනාශ කරන්න සිද්ධ වෙයිද ?

[ 22 - Sep - 2011 ]

ජලාර්දයේ අසුරයෝ ?

2011-09-21T19:33:00.000+05:30

ජලාර්දය , විශ්වයේ ඈත කෙලවරක තියෙන මීදුමේන් වැසී ගත්ත නිල්වන් පලාවන් ලස්සන ග්‍රහ ලෝකයක් . හරියට අවතාර් වල පැන්ඩෝරා ග්‍රහ ලෝකේ වගේ. ජලාර්දයේ ජීවත් වුණේ අසුරයෝ. අසුරයෝ කීවට එයාලත් මිනිස්සු කොටසක්මයි. අභ්‍යවකාශ යුගයේ තාක්ෂණික දියුණුවෙන් හෙම්බත් වෙච්ච නිස්කලංක ජීවිතයක් හොයපු මිනිස්සු වරින්වර විශ්ව පාලන අධිකාරියේ නීති රීති වලින් නිදහස සොයා ජලාර්දයට පැන ගියා. වටිනා කියන ඛනිජ වර්ග කිසිවක් නැති නිසා විශ්ව පාලන අධිකාරිය ජලාර්දය ගැන හෝ එයට පැන යන අය ගැන සොයන්න උනන්දු වුනේ නෑ.

විශ්වයේ ආධිපත්‍යය දරපු සුරයෝ අධිතාක්ෂණික මෙවලම් , දීර්ඝ කාලයක් තරුණ බව රැකගත හැකි වාජීකරණ එන්නත් වගේ දේවල් පාවිච්චි කරමින් දේවත්වයට ලං වෙන්නට උත්සාහ කරද්දි ජලාර්දයේ අසුරයෝ උත්සාහ කලේ හැකිතරම් දුරට ස්වභාව ධර්මයත් එක්ක ස්වභාව ධර්මයේ නීති රීති වලට අනුව ජීවත් වෙන්න.

ජලාර්දයේ අසුරයන්ට හරි අපූරු පුරුද්දක් තිබ්බා. ඒ තමයි හුවමාරු කරගෙන පොත් කියවීමේ පුරුද්ද. ඒ පොත් ලිවුවෙත් අසුරයොමයි. ජලාර්දයට ආපු හැම කෙනෙක්ම යම් ආකාරයක සාහිත්‍යකාමියෙක්. එහෙමත් නැත්තන් ජලාර්දයේ පරිසරය ඒ අයව සාහිත්‍යකාමීන් බවට පත් කළා . මුද්‍රිත පොත් පත් කියන දේ ඉතිහාසයට එකතු වෙලා තියෙද්දි සියලුම පොත්පත් ඩිජිටල්කරණය වී තියෙද්දි අසුරයෝ කැමැත්ත දැක්වුවේ කඩදාසි වල මුද්‍රිත පොත් පත් කියවන්න.

මේ මම කාලෙකට කලින් කියවපු "ජලාර්දයේ අසුරයෝ" නම් විද්‍යා ප්‍රබන්ධයක කොටසක්. අසුරයෝ වගේම මමත් කැමති කඩදාසි වල මුද්‍රිත පොත් කියවන්න. ඒ නිසා මෙවර කොළඹ පොත් ප්‍රදර්ශනයෙන් මමත් පොත් කීපයක් වෙන් කරවා ගත්තා.

මතුයම් දිනක මම එනතුරු ලංකාවේ රහසිගත තැනක මේ පොත් ටික සුරක්ෂිත වී තියේවි.

ඈත අතීතයට ගිය ඇමරිකානුවා 1 සහ 2 --- මාක් ට්වේන් . පරිවර්තනය, රාණි රාජපක්ෂ
මන්ත්‍රකාරියගේ සිරස --- රයිඩර් හැගාර්ඩ් , පරිවර්තනය , චන්ද්‍රසිරි දසනායක
ගැඹුරු මුහුද --- ආතර් සී ක්ලාක්, පරිවර්තනය , සිරිල් සී පෙරේරා
මසුරු සිහින --- ආර් කේ නාරායන් . පරිවර්තනය පේ‍්‍රමරංජිත් තිලකරත්න
ආගන්තුක රෝගියා --- මයිකල් ඔන්ඩච්චි . පරිවර්තනය කේ. ඒ . එන්. පෙරේරා
සක්කාරං --- චම්මින්ද වෙලගෙදර
අතුරුදන් වූ බළලා --- එනිඩ් බ්ලයිට්න් , පරීවර්තනය ලීලානන්ද ගමාච්චි
ආදරණීය ගුරුතුමනි --- රිකාඩෝ බ්‍රෙත්වේට් ,පරීවර්තනය සිරිල් චන්ද්‍රසේකර ගුණවර්ධන
ගංතුලානේ ගණිතාන්දරය -- ආචාර්ය සංජීව පෙරේරා සහ අනුරුද්ධ මහසිංහ

ආ කියන්න අමතක වුණා. ජලාර්දයේ අසුරයන්ට තවත් අපූරු පුරුද්දක් තිබ්බා. ඒ තමයි පොත්පත් මුද්‍රණය කරන්න කඩදාසි ලබාගන්න කපන ගස් වෙනුවෙන් ඒ පොත් කියවන, ලියන අයම නැවතත් ගස් වගා කරන එක.

[ 21 - Sep - 2011 ]

මා දුටු සිහිනයක්

2011-09-12T14:18:00.001+05:30

ග්‍රහකයෙන් කැඩී ගිය කොටසක් වැදීමෙන් ක්‍රෙම්ලිනයට ගිනි ඇවිලුණි. ග්‍රහකයේ ඉතුරු කැබලි ක්ෂිතිජයෙන් ඔබ්බෙහි අතුරුදහන් විය. වරින් වර මහ පොළොව දෙදරුම් කනු දැණුනි. ග්‍රහකයේ ඉතුරු කැබලි තවත් බොහෝ තැන් වලට පහර දෙන්නට ඇත.

ක්‍රෙම්ලිනයෙන් ඇරඹි ගින්න හාත්පස පැතිර යන්නට විය. බොහෝ මිනිස්සු ගින්න නිවා දමන්නට උත්සාහ කළහ. පොළොව මතුපිටින් පමණක් නොව පොළොව අභ්‍යන්තරයේ උමං මාර්ග ඔස්සේද ගින්න පැතිරෙන්නට විය. ගිනි නිවීමේ උත්සාහය අතහැර දැමුණි.

මිනිස්සු මහවැලි ගඟින් ඔබ්බට පළා ගියහ. පිළිස්සුම් තුවාල ලද බොහෝ දෙනෙක් කටුගස්තොට පාලම අසළ තාවකාලික රෝහලකට ගෙන එනු ලැබීය.

මේ සියල්ල සිදු වනු මම ප්ලේන්ටියක් බොමින් මගේ පාඩුවේ බලා සිටියෙමි. ඒත් මේ සියල්ලම දකින්නට මම සිටියේ කොහේද ?

[ 12 - Sep - 2011 ]

චැනල් ටූ || channel 2

2011-09-08T17:00:00.002+05:30

ඊයෙ රෑ නිදිමතේ ඉන්න වෙලේ රේඩියෝ එකේ චැනල් කරකව කරකව හිටියා.ඒ වෙලාවෙ අහු වුණේ චැනල් දෙකයි. එක චැනල් එකකනම් ප්‍රවෘත්තිද කොහෙදො ගියේ. අනිකේ මනමේ නාඩගම වෙන්න ඕනේ. සැරින් සැරේ ඇහැරිච්ච වෙලාවල් වල ඇහිච්ච ඒවයින් මතක එවුවා.
=============

"ඇමරිකානු ප්‍රහාරක ගුවන් යානා 10ක් ශ්‍රී ලංකා ගුවන් කලාපය උල්ලංඝනය කරයි . ඉවත්ව යන ලෙස දැන්වීමෙන් පසු පිටව යයි"

ගියා වැද්දෝ...
නොම විද්දෝ...
ඉඩ ලද්දෝ...
අපි මෙවරා...

"ශ්‍රී ලංකාව ස්වාධීන රාජ්‍යයක්. ජනාධිපති ආචාර්ය මහින්ද රාජපක්ෂ මැතිතුමා ඉන්දීය අගමැති ආචාර‍්ය මනමෝහන් සිංට පිළිතුරු දෙයි"

මුළු දඹදිවටම තොප මහ රජ වුව
මගෙ විජිතය මෙම, මම වෙමි අගරජ

"යුධ අපරාධ සිදුවී ඇති බවට ඇමරිකානු රාජ්‍ය ලේකම් හිලරි ක්ලින්ටන් නඟන චෝදනා පදනම් විරහිතයි, ආරක්ෂක ලේකම්වරයා පවසයි"

ඔබ ප්‍රිය කළ හිමි මාව මරන්නට
තැත්කල හින්දා ... තැත්කල හින්දා ...
සිය පණ ගලවා ගන්නට මැරුවෙමි
නෑ මගෙ දෝසා .... නෑ මගෙ දෝසා ...

[ 08 - Sep - 2011 ]

නරියා සහ පොඩ්ඩි කෙල්ල

2011-08-30T04:51:00.003+05:30

බූරු කෙල්ලගෙ කතන්දරේ කියවපු වලවුවෙ පොඩ්ඩි කෙල්ලටත් ආසා හිතුණලු පොඩ්ඩි කෙල්ලක් ගැන කතන්දරයක් ලියන්න. මෙන්න පොඩ්ඩි කෙල්ල ලියල එවපු කතන්දරේ
=====================

ඔන්න එකමත් රටක, පොඩි කැලයක්අයිනේ ,පොඩි කඳු ගැට්ටක තිබුනු ගේ පොඩ්ඩක පොඩ්ඩි කියලා හුරුබුහුටි, කෙලි පොඩ්ඩක් හිටියලු එයාගෙ අත්තම්මත් එක්ක.

මේ ඉන්නෙ පොඩ්ඩි කෙල්ලයි පොඩ්ඩිගේ අත්තම්මයි
පොඩ්ඩි බිත්තියේ චිත්‍ර අඳිමින්

පොඩ්ඩිගේ ගේ ළඟ තිබ්බ කැලෑවෙ හිටියලු මුකලන් බස්සෝ,පුංචි හා පැටික්කියෝ, සුදු පූසෝ, වල් ඌරෝ, මී මින්නු, බැටලුවෝ ..... වගේ අය ගොඩාආරියක් කට්ටිය . ඒ කැලෑවෙ හිටියලු නරියෙකුත්. මෙන්න මේ නරියා තමාභයානකම සතා . හරිම කෆටිලු.

කැලෑව මැද විලේ හිටපු මකර පැටියා තමයි පොඩ්ඩි කෙල්ලගේ හොඳම යාලුවා. මේ දෙන්නා හැමදාම කැලැවෙ ඇවිද ඇවිද සින්දු කිය කියා නට නටා සෙල්ලම් කලා. හා පැටික්කියි සුදුපූසායිත් මේ දෙන්නගෙ සෙල්ලමට එකතු වුණා මුකලන් බස්සා මේ අයගෙ සෙල්ලම් බල බලා නට, නටා උඩින් පියෑඹුවා. මකර පැටියාගෙ බවුවත් මේ අය එක්ක හරි හරියට නැටුවා

ඇහැළ මලින් ගස් පිරිලා බලන්න හරි ලස්සනයි

අඹ රඹුටන් ජම්බු ඉදිලා අද හැම තැන හරි හැඩයි

මෙයාලා සෙල්ලම් කරද්දි හැමදාම නරි රාළ මෙයාලා දිහා බලාහිටියා. එයාට ඕන උනේ කොහොම හරි පොඩ්ඩි කෙල්ලව අල්ලගන්ට. පොඩ්ඩි කෙල්ලව හුරතලේට එයා ගාව තියා ගන්න.

ඉතින් හැමදාම නටලා, නටලා, පොඩ්ඩි කෙල්ල ගෙදර එන්නේ හොඳටම හැන්දෑ වෙලා. ඔච්චර හැන්දෑ වෙනකම් කැලෑවෙ ඇවිදින්න එපා කියල අත්තම්ම අවවාද කළත් මේ නෝටි කෙළි පොඩ්ඩ ඒක කණකටවත් ගත්තෙ නෑ. බලන් ඉන්ට බැරි තැන එක දවසක් අත්තම්මාඑයාට කෑගැහැව්වා. " උඹව කවදා හරි අර කැලේ ඉන්නනරි රාළට දෙනවා කැලේටම වෙලා ඉන්න" . ගේ අද්දර කැලේට වෙලා හිටපු නරි රාළට මේක ඇහිලාහරි සතුටු හිතුනා. මිනිස්සු බොරු නොකියන කොටසක් බව තමයි නරි රාළ හිතුවේ.

පොඩ්ඩි ඉතින් පොඩි හන්දා මේ මුකුත්තේරෙන්නෙ නැනේ. එයා පහුවදාත් ගියා කැලේට. එදා මකර පැටියාට හොඳටම හෙම්බිරිස්සාව. කිඹුහුම් යවනකොට නහයෙන් ගිනි බෝල පිට වෙනවා. ඉතින් එදා මේ අයට සෙල්ලම් කරන්න බැරි වුණා. හා පැටික්කි කැරට් අහුලන්න කියල ගියා. සුදු පූවා සමනල්ලු බලන්න ගියා. පොඩ්ඩි කෙල්ල මකර පැටියට මල් කඩල දෙන්න හිතාගෙන ගඟ අද්දරට ගියා.

පොඩ්ඩි කෙල්ල තනියම ඉන්නවා දැකපු නරි රාළ පොඩ්ඩි කෙල්ල ගාවට ගිහින් කිවුවා "ඔයාගෙ අත්තම්මා කීවා ඔයාව මට දෙනවා කියල. යමු මාත් එක්ක". පොඩ්ඩි කෙල්ල පොඩි නිසා නරියා කියපු කතාවට රැවටුණා. අත්තම්මත් කිවුවනෙ නරියට දෙනවා කියල. එයා නරියා එක්ක නරි ගුහාවට ගියා.

රෑ බෝ වීගෙන එද්දි පොඩ්ඩි කෙල්ලට බය හිතුණා. එයා කවදාවත් එච්චර රෑ වෙනකම් කැලේ ඉඳල නෑ. පොඩ්ඩි කෙල්ලට අත්තම්මව මතක් වුණා. "මට ගෙදර යන්න ඕනෙ, මට අත්තම්මව ඕනෙ" පොඩ්ඩි කෙල්ල අඬන්න පටන් ගත්තා. "බෑ බෑ එහෙම යන්න දෙන්න බෑ" නරි රාළ සැර දැම්මා . පොඩ්ඩි කෙල්ලට කවුරුවත් එහෙම සැර දාල නෑ. පොඩ්ඩි කෙල්ල ඉකි ගගහ අඬන්න පටන් ගත්තා.

නරි රාළ පොඩ්ඩි කෙල්ලව නළවන්න හිතාගෙන සින්දුවක් කියන්න පටන් ගත්තා.

" හඳ පායන කල ගඟ බඩ ඉඳගන නුඹෙ හිසපීරන්නම්...නුඹෙ හිස පීරන්නම්..

කෙහෙල් මුහ.. අ.. අ... අ.... සහරොස් පරිප්පු සමගින් බත් උයලා දෙඤ්ඤං...

නුඹහට අයිස් කිරිඤ්ඤා දෙන්නම් …..නුඹහටවැනිලා අයිස්ක්‍රීමුත් දෙඤ්ඤං

කුමටද පොඩ්ඩියේ කඳුලු සලන්නේ...."

ඒත් ඒත් පොඩ්ඩිගේ ඇඬිල්ල නතර වුණේ නෑ

රෑ ජාමෙ රස්තියාදු ගහන මුකලන් බස්සට ඇහුණා පොඩ්ඩිගෙ ඇඬිල්ල . සද්දෙ ඇහෙන පැත්තට බස්සා හයියෙන් හයියෙන් පියාඹගෙන ගියා . මෙන්න වැඩක් ! පොඩ්ඩි අඬනවා. නරි රාළ නැට්ට වන වනා සිංදු කියනවා. සින්දු කියන ගමන් සැරින් සැරේ ගොරවනවත් එක්ක.

පොඩ්ඩි අඬනවා. නරි රාළ සිංදු කියනවා

ඒක දැකපු බස්සා 'බස, බස, ' ගාලා ගිහින් මේ විත්තිය සුදු පූසටයි, හා පැටික්කිටයි කීවා. එයාලා දුවලා ගිහින් ඒක මකර පැටියගෙ කනේ තිබ්බා. ..දැන් ඉතින් මකර පැටියයි, සුදු පූසයි, හාපැටික්කියි, බස්සයි, මකර පැටියගේ බව්වයි එකතු වෙලා පොඩ්ඩිකෙල්ලව බේරගන්න විදියක් ගැන කතා කරනවා.

'නරියෝ බව්වන්ට බයයි' බව්වා කීවා. 'එහෙනම් අපි පොඩ්ඩි කෙල්ලව කොල්ල කමු, බවුවා තමයි මුහුදු කොල්ල කාරයා ' සුදු පූ කිවුවා. 'බවුවගෙ එක ඇහැක් වහන්න ඕනෙ, මුහුදු කොල්ලකාරයො ඉන්නෙ එහෙමයි' මකර පැටියා කිවුවා. ඇත්ත නේන්නම්. කට්ටිය එකතුවෙලා බව්වගේ එක ඇහැක් වැහුවා.

මුහුදු කොල්ලකාර බවුවා

මුහුදු කොල්ලකාර බවුවා කඩදාසි බෝට්ටුවක නැගලා ගඟ දිගේ නරි ගුහාව ආක්‍රමණය කළා. බස්සාඔත්තු බැලුවා. නරියට බව්වගේ ඉව දැනුනා විතරයි කැලේ කඩාගන දුවන්ටපටන්ගත්තා. නරි රාළ පැනල ගියපු ගමන් පුසයි, හා පැටික්කියි ඇවිත් පොඩ්ඩි කෙල්ල අඬන එක නවත්තා ගත්තා. මකර පැටිය දුම්, විහිද, විහිද පොඩ්ඩිව පිට උඩ තියාගෙන පියඹලා ගිහින් පොඩ්ඩි කෙල්ලව අත්තම්මට භාර දුන්නා

පොඩ්ඩිව නරියාගෙන් බේරාගෙන

එදායින් පස්සෙ පොඩ්ඩි කෙල්ල නෝටි වුණේ නෑ. නරියට රැවටෙන්න මෝඩ වුණෙත් නෑ .ඉතින් ඊට පස්සේ යාලුවෝ ටික පරණ විදියටසතුටින් සිංදු කිය, කිය නට, නට හිටියා සතුටින් හිටියා.

කතාව ලියා එවුවේ පොඩ්ඩි කෙල්ල
කතාවට ලුණු ඇඹුල් දැම්මේ මකර පැටියා
කතාව සහතික කළේ අත්තම්මා

[ 30 - Aug - 2011 ]

ටෑන් ටෑන් ටෑන් ටෑන් || Tan Tan Tan Tan

2011-08-28T09:15:00.002+05:30

අද උදේ පාන්දර සිංගාරප්පුවට අලුත් ජනාධිපති කෙනෙක් ලැබුණා. ඒ තමයි ආචාර්ය ටෝනි ටෑන් . ඒ ඊයේ පැවැත්වුණු ජනාධිපතිවරණයේ ප්‍රතිපල අනුව.

සිංගප්පූරුවේ ජනාධිපතිවරණයක් පැවැත්වුණේ සෑහෙන කාලෙකට පස්සෙලු. මීට පෙර හිටපු ජනාධිපතිවරයා සෙල්ලප්පන් රාමනාදන් 1999 සහ 2005 දෙවාරයකදීම නිතරඟයෙනුයි ජනාධිපති ධුරයට පත් වෙලා තියෙන්නෙ.

කාලෙකට පස්සෙ මෙවර පවත්වපු ජනාධිපතිවරණයට අපේක්ෂකයො 4 දෙනෙක් ඉදිරිපත් වුණා. ඒ හතර දෙනාම ටෑන්ලා. ඒ අය තමයි ..

1. ආචාර්ය ටෝනි ටෑන්

2. වෛද්‍ය ටෑන් චෙන්

3. ටෑන් ජී

4. ටෑන් කින්

හිටපු උප අගමැතිවරයෙක් වන ආචාර්ය ටෝනි ටෑන් මීට මාස 2කට පෙර ජනාධිපතිවරණයට ඉදිරිපත් වන බව නිවේදනය කරද්දි ඔහුට නිතරඟ ජයක් හෝ පහසු ජයක් ලැබෙයි කියා අපේක්ෂා කළත් අනිත් ටෑන්ලාගේ ඉදිරිපත් වීම සමඟ ඒක එහෙම වුණේ නෑ. අන්තිමට තරඟය කොච්චර තියුණු වෙලාද කියනවනම් ඊයෙ රෑ චන්ද දෙවෙනි වරටත් ගණන් කරන්න වෙලා. ආචාර්ය ටෝනි ටෑන් සහ වෛද්‍ය ටෑන් චෙන් දෙදෙනාම 35% ට ආසන්න චන්ද ප්‍රතිශත බැගින් ලබාගෙන. අනිත් ටෑන්ලා දෙන්නාගේ එකතුවත් 30% කට ආසන්නයි. ආචාර්ය ටෑන් වෛද්‍ය ටෑන්ට වඩා අරගෙන තියෙන්නෙ චන්ද 7,269 ක්. ඒ ලක්ෂ 21ක් පමණ වූ චන්ද සංඛ්‍යාවකින්.

පසුගිය මැයි මාසයේ පැවති පාර්ලිමේන්තු මහමැතිවරණයනම් තනි අශ්වයාගේ රේස් එකක් වගෙ තිබ්බෙ. ඒකෙදි පාලක පක්ෂය 90% කට වැඩි පාර්ලිමේන්තු බලයයක් ලබා ගත්තා. ( 90% කට වඩා ගත්තට ඒක 1965 න් පස්සෙ බිහි වෙච්ච දුර්වලම ආණ්ඩුවලු ) මේ තියෙන්නෙ මහ මැතිවරණය ගැන ලියපුවා

1. සිංගප්පූරුවේ මැතිවරණ උණුසුම

2. මෙන්න තවත් ඡන්ද ප්‍රතිපලයක්

ජනාධිපති තනතුර ස්වාධීන එකක් ලෙස පැවතිය යුතු නිසා දේශපාලන පක්ෂ වලට ජනාධිපතිවරණයකදී සක්‍රීයව දායක වෙන්න බෑ. අපේක්ෂකයන් ඉදිරිපත් විය යුත්තේ තනි පුද්ගලයන් විදිහට. දේශපාලන පක්ෂ වල සාමාජිකත්වය දරන අයට ජනාධිපති තනතුරට ඉදිරිපත් වෙන්න බෑ. ආචාර්ය ටෝනි ටෑන් පහුගිය ජුනි මාසයේ මහජන ක්‍රියාකාරී පක්ෂයේ තනතුරු වලින් ඉවත් වෙලා ඊට පස්සෙයි ජනාධිපතිවරණයට ඉදිරිපත් වෙන බව නිවේදනය කළේ.

ජනාධිපති තනතුර බොහෝ දුරට උත්සව අවස්ථා සඳහා සංකේතාත්මක එකක් වුණත් ජනාධිපතිවරයාටත් යම් යම් පරිපාලන සහ මුදල් බලතල හිමි වෙලා තියෙනවා. අග්‍ර විනිශ්චයකාරවරයා, හමුදා ප්‍රධානීන් වැනි ඉහළ තනතුරු පත් කිරීමේදී ජනාධිපතිවරයාට නිෂේධ බලය හිමියි. ඒ වගේම රටේ විදේශ සංචිත භාවිතා කිරීමේ සීමා නියම කිරීම ජනාධිපති වරයාගේ පාලනය යටතේයි සිදු වෙන්නෙ. ( වැඩි විස්තර මෙතනින් බලන්න )

අලුත් ජනාධිපතිවරයාට මකර අධිරාජයාගේ උණුසුම් සුභපැතුම් !!!

[ 28 - Aug - 2011 ]

ලින්කන්ගේ බූරු කතාව

2011-08-25T03:55:00.000+05:30

ඔන්න එකමත් එක රටක දඩ කෙළියට බොහොම කැමති රජතුමෙක් හිටියලු. මේ රජතුමාට එක දවසක් දඩ කෙළියේ යන්න හිතිලා තමන්ගේ කාලගූණ ඇමතියගෙන් ඇහුවලු එදා දවසෙ කාලගුණය එහෙම කොහොම වෙයිද? කියලා. ඇමතියා කිවුවලු "දේවයන් වහන්ස, අද දඩකෙළියට බොහොම හොඳ දවසක් , හොඳ පැහැබර කාලගුණයක් තියෙයි" කියලා

ඉතින් රජතුමා සේනා වාහන එහෙම සංවිධානය කරගෙන දඩ කෙළියට පිටත් වුණාලු. ඔය යන අතරමඟදි මේ පිරිසට හම්බ වුණාලු ගොවියෙක්. මේ ගොවියා බොහොම යටහත් පහත්ව රජතුමාට කිවුවලු "දේවයන් වහන්ස, තව ටික වෙලාවකින් වැස්සක් පටන් ගනියි, මේක දඩ කෙළියට යන්න සුදුසු වෙලාවක් නෙවෙයි" කියලා. රජතුමා උපහාසෙන් හිනා වෙලා අර ගොවියව නොසළකා හැරල තමන්ගෙ ගමන පිටත් වුණාලු. මොකද රජතුමාගෙ නුවණැති කාලගූණ ඇමතියා කියලනෙ තියෙන්නෙ එදා දවස දඩ කෙළියට බොහොම හොඳයි කියල.

ඒත් රජතුමා ඇතුළු පිරිස වනාන්තර සීමාවට කිට්ටු වෙනකොටම නොහිතපු විදිහට අනෝරා වැස්සක් වහින්න පටන් ගත්තලු. රජතුමා ඇතුළු පිරිස හොඳටම තෙතබරියන් වුණාලු. රජතුමා බොහොම කෝපවෙලා තෙතබරියන් ඇඳුම් පිටින් ආපහු මාළිගාවට ගියාලු. මාළිගාවට ගියපු ගමන් වැරදි කාලගුණ අනාවැකි කියපු ඇමතියව තනතුරෙන් පහ කළාලු. රාජපුරුෂයන්ට නියෝග කළාලු අර අතරමඟදි හම්බ වෙච්ච ගොවියව කැඳවන් එන්න කියල

ඒ ගොවියා බයෙන් ගැහි ගැහී රාජ සභාවට ආවලු. රජතුමා ඒ ගොවියට කිවුවලු වහාම කාලගූණ ඇමති කම භාර ගන්න ලෑස්ති වෙන්න කියල. ඒ ගොවියා කිවුවලු "අනේ දේවයන් වහන්ස, මම බොහොම නූගත් ගොවියෙක්, ඇමතිකමක් වගේ භාරධූර වැඩක් කරන්න තරම් මට දැනුමක් නෑ" කියල. රජතුමා කිවුවලු "ඔබ අද වහිනවා කියල නිවැරදිව කිවුවා, මේ ඇමති කම කරන්න ඒ දැනුම හොඳටම ඇති" කියලා.

ගොවියා කිවුවලු "අනේ දේවයන් වහන්ස, ඒ මගේ විශේෂ දැනුමකින් කියපු දෙයක් නෙවෙයි, මගේ බූරුවා වහින්න කිට්ටු වෙලාවට එක කණක් පහත් කර ගන්නවා. බූරුවා තමයි මට මේවා කියන්නෙ" කියලා. රජතුමා ගොවියව ආපහු පිටත් කරල ඇරල ගොවියගෙ බූරුවව ගෙන්නගෙන බූරුවව කාලගුණ ඇමති කමට පත් කර ගත්තලු.

ඔන්න ඔතන තමයි රජතුමා වැඩ වරද්ද ගත්තෙ. එදායින් පස්සෙ හැම බූරුවම රජයේ තනතුරු ඉල්ලන්න පටන් ගත්තලු.

මේ කතාව ඇමරිකාවෙ හිටපු ජනාධිපති ඒබ්‍රහම් ලින්කන් තමන්ගෙ දේශපාලන ආධාරකරුවන් පිරිසකට කියපු කතාවක්ලු. ලින්කන් ජනාධිපති වුණාට පස්සෙ දේශපාලන ආධාරකාරයො තමන්ගෙ සුදුසුකම් වලට නොගැලපෙන එක එක තනතුරු ඉල්ලගෙන ආපු එක ලින්කන්ට මහ කරදරයක් වුණාලු. ලින්කන් ආධාරකරුවන් රැස් කරල මේ බූරු කතාව කියල තියෙන්නෙ ඒ කරදරෙන් බේරෙන්නලු. ලින්කන්ගෙ බූරු කතාවෙන් පස්සෙ ඒ කරදර සෑහෙන්න අඩු වුණා කියලයි කියන්නෙ.

බූරු කතාවක් කියලා

රැවුලයි කැඳයි දෙකම බේර ගත්ත

ඒබ්‍රහම් ලින්කන් ජනාධිපතිතුමා

ප.ලි - 1

මට මේ බූරු කතාව මතක් වුණේ බඹදත් රාජ සභාවෙ නටපු බූරු කෙල්ල ගෙ කතාව ලිවුවට පස්සෙ. කාලෙකට කලින් මේ කතාව ලින්කන්ගේ චරිතාපදාන පරිවර්තන පොතක කියෙවුවා. මේ කතාවෙ ඉංගිරිස් වර්සන් එකක් මෙතන තිබේ. ලින්කන්ගේ රැවුල ගැනත් ප්‍රසිද්ධ ඇත්ත කතන්දරයක් තිබේ

ප.ලි - 2

මේ කතාවෙ ඉංගිරිස් වර්ශන් එකක් හොයද්දියි දැන ගත්තෙ බූරුවත් අලියා වගේම දේශපාලන සත්වයෙක් කියලා. ලංකාවෙ එක්සත් ජාතික පක්ෂයේ සහ ඇමරිකාවෙ රිපබ්ලිකන් පක්ෂයේ සළකුණ අලියා කියල දැනන් හිටියට ඇමරිකාවෙ ඩිමොක්‍රටික් පක්ෂයේ සළකුණ බූරුවා කියල අදයි දැන ගත්තෙ. මෙන්න වැඩි විස්තර.

[ 25 - Aug - 2011 ]

බූරු කෙල්ල

2011-08-19T17:14:00.005+05:30

ඔන්න ඉස්සර කාලෙ බරණැස් නුවර බඹදත් රජ්ජුරුවො දැහැමෙන් සෙමෙන් රාජ්‍ය කරන කාලෙ ඒ රජ්ජුරුවන්ගේ මාළිගාවෙ බර වැඩ කරල දෙන රාජකීය බූරුවෙක් හිටියලු. මේ රාජකීය බූරුවා යාලු වෙලා හිටියලු බොහොම ලස්සන බූරු කෙල්ලෙක් එක්ක. බූරු කෙලී හරි ලස්සනයිලු. දණහිස ලඟට දිග නැට්ටක් තිබ්බලු. ඔය උඩ ඉන්නෙ ඒ බූරු කෙල්ල.

ඔය බූරු කෙල්ල එක දවසක් දැක්කලු මනුස්ස කෙල්ලො රංචුවක් කනේ මල් ගහගෙන ගං ඉවුරෙ නටනවා. ඕක දැකල මේ බූරු කෙල්ලටත් අහිංසක ආසාවක් ආවලු කනේ මලක් ගහගෙන නටන්න. ඉතින් මේ බූරු කෙලී බූරු කොල්ලට, ඒ කිවුවෙ අර රාජකීය බූරුවට කිවුවලු "අනේ මටත් මලක් ගෙනත් දෙන්න , මට හරි ආසයි මලක් ගහගෙන නටන්න" කියල. රාජකීය බූරුවා බූරු කෙලීට උම්මා එකක් එහෙම දීල කිවුවලු හවස වැඩ ඇරිල එනකොට මලක් ගේන්නම් කියල.

ඔන්න ඉතින් බූරු කෙලී බොහොම සන්තෝසෙන් බලන් හිටියලු හවස් වෙනකම්. බූරු කොලුවා රජ මාලිගාවෙ බර වැඩ කරල ඉවර වෙලා හවස ආපහු එද්දි මතක් වුණාලු මල් පොරොන්දුව. බූරු කොලුවා ගියාලු මල් කඩ තිබ්බ වීදියට. හෆොයි ඒ කඩවල් වල මල් අස්ප ගණංලු ( බූරු ගණං නෙවෙයිලු ). බූරුවගෙ වැටුපට ඔරොත්තු දෙන්නෙ නෑ නෑ වගේලු. බූරු කොලුවා දහ අතේ කල්පනා කළාලු මේකට මොකෝ කරන්නෙ කියල. ඉතින් බූරු කොලුවා මලක් "ගම්දෝ නොගම්දෝ" කියල හිත හිත හෙමීට ඇවිදිනකොට ආපහු නොදැනීම වගේ බඹදත් රජ මාලිගාව කිට්ටුවට ආවලු. ඔන්න එතකොට බූරුවට මතක් වුණාලු එදා දවල් බිසවගේ කාමරේට මල් මිටියක් ඩිලිවර් කළා නේද කියල.

ඉතින් බූරු කොලුවා නිකමට වගේ බිසවගෙ කාමරේට හොම්බ දාල බැලුවලු. මේ තියෙන්නෙ මල් පොකුර දවල් තියල ගියා වගේම. බූරුවට හිතුනලු ඕකෙන් එක මලක් අඩු වුණාට බිසවට දැනෙන එකක් නෑ කියල. එහෙම හිතල මල් මිටියෙන් මලක් අරගෙන බූරු කෙලීව බලන්න පිටත් වුණාලු.

මෙන්න බූරු කොල්ලා මලක් කටින් අරගෙන කෙල්ල බලන්න යන හැටි.

ලස්සන ලිලී මලක් අරන් ආපු බූරු කොලුව ගැන බූරු කෙලීට ආආදරේ හිතුනලු. උම්මා ගොඩාක් දුන්නලු. ඒ මල කනේ ගහගෙන බූරු කොලුවට පේන්න හොඳට නැටුවලු. බූරු කොලුවත් සන්තෝසෙන් අත්පුඩි ගගහ කෙලීගෙ නැටුම් බලනවලු

මේ අස්සෙ බඹදත් රජ මාලිගාවෙ හරිම ලොකු කලබගෑනියක්ලු. රජතුමා බිසවට බනිනවලු මල් 13ක මල් පොකුරක් රජතුමාට පිරිනැමුවා කියලා. 13 අසුභයි කියලලු මේ රණ්ඩුව. බිසව දහ අතේ දිවුරල කියනවලු මම ඕඩර් කළේ මල් 14ක පොකුරක් කියල. බඹදත් රජතුමා නියෝග කළාලු වහාම මේ ගැන පරීක්ෂණයක් පවත්වන්න. විගණන අංශය තහවුරු කළාලු මල් 14ක පොකුරක් ලැබුණා කියල. ඉතින් ඊට පස්සෙ ආරක්ෂක අංශ වලට පැවරුණාලු හොරකමක්වත් වුණාද කියල හොයන්න.

අන්තංපුරේ CCTV සිකුරිටි කැමරාවල පැහැදිලිවම සටහන් වෙලා තියෙනවලු බූරුවා හොරා වගේ හෙමීට හෙමීට ඇවිදින් මලක් පැහැරගන්න දර්ශනය. බඹදත් රජතුමා නියෝග කළාලු වහාම රාජ බූරුවව අත්අඩංගුවට ගන්න.ඔන්න ඉතින් අර බූරු කෙලී කනේ ලිලී මලක් ගහගෙන නට නට ඉන්න අතරෙ ඔතනට හදිසියෙම කඩා පාත් වුණාලු රාජ පුරුෂයො. ඇවිත් බූරුවව අත් අඩංගුවට ගත්තලු. අස්ථානගත වෙච්ච මල බූරු කෙල්ලගෙ කනේ තිබ්බ හින්දා බූරු කෙල්ලටත් මාංචු වැටුනලු . පවූඌඌඌඌ

ඉතින් මේ බූරු ජෝඩුව රාජ සභාවට එක්කන් ගියාලු. රජතුමා සැර දාල ඇහුවලු ඇහුවලු මොකද මල හොරකම් කළේ කියල කියල. බූරු කොල්ලා කඳුලු පිරි දෙනෙතින් කිවුවලු දුප්පත් කම හින්දයි එහෙම කළේ කියල. බූරු කෙල්ල කිවුවලු කනේ මලක් ගහගෙන නටන්න ඇති වෙච්ච ආසාව.

රජතුමාට පවුඌඌ හිතුනලු. බර වැඩ කරන අඩු පඩි ලබන බූරුවෙක්නෙ. ආයෙ මේවගේ වැඩ කරන්න එපා කියල අවවාද කරල සියළු චෝදනා වලින් බූරු ජෝඩුවව නිදොස් කොට නිදහස් කළාලු. සමාව විතරක් නෙවෙයි බඹදත් රජතුමාගෙන් තෑග්ගකුත් හම්බ වුණාලු. තෑග්ග තමයි බූරු කෙලීට දවසකට මල බැගින් දීමනාවක් සමඟ රජ මැදුරේ රැකියාවක්. බූරු කෙලීට දැන් හැමදාම මල ගානෙ හම්බ වෙනවලු. එයාගෙ ඩියුටිය තමයි ඒ මල කනේ ගහගෙන රාජ සභාවෙ නටන එක.

මෙන්න බූරු කෙල්ල බඹදත් රාජ සභාවෙ නටනව.

රජතුමායි ඇමති වරුයි හරිම ආස වුණාලු බූරු කෙලීගෙ නැටුම් වලට. දිග වලිගයක් තියෙන ලස්සන බූරු කෙල්ලෙක්නෙ. ඔන්න ඉතින් රජතුමාගෙයි ඇමතිවරුන්ගෙයි හිත දිනා ගත්ත බූරු කෙලීගෙ පඩිය හිටු කියල වැඩි වුණාලු. බූරු කොලුවා තවමත් අඩු පඩි ලබන දහඩිය දමන බර වැඩමලු. බූරු කෙලී A/C එහෙමත් තියෙන රාජ සභාවෙ වැඩි පඩි ලබන රැකියාවකලු දැන්.

බූරු කොලුවට මේකට අස්පට් ගැහුවලු. කිවුවලු වහාම ඔය රස්සාවෙන් අස් වෙන්න කියල. මෙන්න බූරු කෙල්ලට සැර දානවා

බූරු කෙල්ලත් කොල්ලට ආදරේ හින්දා රජතුමාට බොරුවක් කියල රස්සාවෙන් අස් වුණාලු. රස්සාවෙන් අස් වෙච්ච නිසා මල් දීමනාවත් නතර වුණාලු. ටික කාලයක් යනතුරු බැංකු පොතේ ඉතුරු වෙලා තිබ්බ සල්ලි වලින් බූරු කොල්ලා ලව්වා මල් ගෙන්නවා ගත්තලු. ඔන්න ඉතින් අඟහිඟකම් මතු වෙන්න පටන් ගත්තලු. බූරු කෙල්ල මල් වලට ඇබ්බැහි වෙලානෙ දැන්. බූරු කොල්ලගෙ අඩු පඩි ලබන බර වැඩ රැකියාවෙන් මෙ ඔක්කොම ආම්බාම් කරන්න බැරි තත්වයක් ආවලු.

බූරු කොල්ලා වැඩි පඩි ලබන්න කියල හිතන් බලු වැඩ කරන්න ගිහින් රජතුමාගෙන් හොඳටම බැනුමුත් ඇහුවලු. පෙර වැරදි තියෙන හින්දා හිටපු තනතුරෙන් පහළටත් දැම්මලු. ඕකනෙ කියන්නෙ බල්ලගෙ වැඩ බූරුවා කරන්න හොඳ නෑ කියල.

බූරු කොල්ලට හොඳටම තරහ ගියාලු. මෙ ඔක්කොම වුණේ මේ බූරු කෙල්ලගෙ මල් පිස්සුව හින්දනෙ කියල බූරුව කරපු වැඩේ බූරු කෙල්ලට බූට් තිබ්බලු. දැන් බූරු කෙල්ලට බූරුවත් නැහැලු., මලුත් නෑලු, ජොබ් එකත් නෑ ලු.

බූරු කෙල්ලට දුක හිතුනලු. කමක් නෑ මමම මල් හොයා ගන්නව කියල හිතාගෙන බූරු කෙල්ල තනියම ස්වෝත්සාහයෙන් මල් වගාවක් පටන් ගත්තලු. මේ මල් වගාව ටිකින් ටික දියුණු වුණාලු. දැන් බූරු කෙලීට කනේ ගහන්න මල් ඕනෙවටත් වඩාලු.හිටපු රාජ සේවිකා බූරු කෙලීගෙ ලස්සන මල් වගාව ගැන බඹදත් රජතුමාටත් ආරංචි වෙලා රජ මාලිගාවට මල් සප්ලයි කරන්න ඕඩර් එකකුත් ආවලු .

බූරු කෙලීගෙ ෆාම් එකෙන් හැමදාම උදේට මල් මිටියක් රජ ගෙදරට ට්‍රාන්ස්පොර්ට් කරන වැඩේ බාර වුනේ රජ ගෙදර ඔය වගේ බර වැඩ කරන බූරුවටලු. බූරුවට මේක මහ ලැජ්ජාවක් වුණාලු. බූරුවා රාජකීය රස්සාවත් අතඇරල රටෙනුත් පැනල ගියාලු

අලුතෙන් ඒ තනතුරට පත් වුණේ හොඳ කඩවසම් උගත් තරුණ බූරුවෙක්ලු. රැකියා විරහිතව හිටපු උපාධිධාරී උගත් බූරුවෙක්ලු. උගත් කමට ගැලපෙන්නෙ නෑ නෑ වගේ වුණත් වෙන රස්සාවක් ලැබුණෙ නැති නිසාලු රජ ගෙදර බර වැඩ වලට ආවෙ.

අලුත් රාජ බූරුවා හැමදාම උදේට මල් මිටිය ගෙනියන්න ඇවිත් පැයක් හමාරක් බූරු කෙල්ල එක්ක මල් කඩ කඩ ඉන්නත් පුරුදු වුණාලු. කාලයක් ගත වෙද්දෙ මේ දෙන්නා නොදැනීම දෙන්නට දෙන්න අයි ලවු යූ වුණාලු. ඊට පස්සෙ දෙන්න කසාද බැඳල පින්වත් බූරු පැටවු එහෙම ලබල දැහැමෙන් සෙමෙන් ජීවිතය ගත කලාලු.

එතකොට අර පරණ බූරුවට මොකෝ වුණේ ? පරණ බූරුවා රට අත ඇරල ගියා. එයා ගැන ඊට පස්සෙ පොත් පත් වල සඳහනක් නෑ.

[ 19 - Aug - 2011 ]

පාතාල මර්ධනය

2011-08-19T09:09:00.002+05:30

නිති නිරිඳුගෙ රැකවලෙහි .........නියුත්තෝ
රුති ලෙස රුපුනොද බිඳ ජය....... ගත්තෝ
පැති රෙන වෙණ නද බැඳුණු.....සිතැත්තෝ
අති නවි ගිලිහෙන බව නොම.........දත්තෝ

- ගුත්තිල කාව්‍යයෙන් -

[ 19 - Aug - 2011 ]

ඕං ග්‍රීං කට්ටු කට්ටු - ග්‍රීස් යකා මට්ටු මට්ටු

2011-08-17T11:32:00.003+05:30

දෙවිවරු සිටිනවානම් යක්ෂයන්ද සිටිය යුතුමය. ආසනික් දෙවියන්ගෙන් පසුව අලුත්ම ප්‍රවණතාවය ග්‍රීස් යක්කුය. ග්‍රීස් යක්කු මිස ග්‍රීස් යකින්නියන් නැත. මෙය ග්‍රීස් යක්කු ඕපපාතික බවට හොඳම සාක්ෂියකි.

ග්‍රීස් යක්කු එන්නේ යකාගේ කම්මලේ සිටය. ඒ අය යක්ෂ කම්මලේ බර වැඩ කර ජීවිකාව කර ගන්න අහිංසක යක්කුය. කම්මල් වැඩ මුරය ඉවර කර ග්‍රීස් ගෑවුනු ඇඳුම් පිටින් ගඟට යන යක්කුන්ට මිනිස්සු බය වෙනවාය.

සමහර අයනම් කියන්නේ ග්‍රීස් යකුන් මිනිස්සු හිතෙන් මවා ගත් දේවල් කියාය. ඒත් යකාගේ කම්මල වනාහි කලබල වූ සිත බව දන්නෝ දනිති. නොදන්නෝ දැන ගනිත්වා !

[ 17 - Aug - 2011 ]

ෆෝන් ෆෝබියා

2011-07-23T21:20:00.002+05:30

මේ චූටි හතරැස් කෑල්ල

කොයි වෙලේ හරි ට්‍රීං ට්‍රීං ගාලා

මගේ හිත අවුල් කරයිද කියල

මම හරිම බයෙන් ඉන්නෙ

ඇල්බට් අයින්ස්ටයින් කියල තියෙන්නෙ මේ ලෝකෙන් මී මැස්සෝ වඳ වෙලා ගියොත් එයින් අවුරුදු 4ක් ඇතුළත මිනිස්සු වඳ වෙලා යනවා කියලා. පරිසර පද්ධති වල බිඳ වැටීම නිසා මේ කියන දේ ඇත්තටම වෙන්න පුළුවන්.මී මැස්සන්ට අද තියෙන ප්‍රධානම තර්ජනයක්ලු ජංගම දුරකථන සඥා. ඒවා මී මැස්සන්ගෙ ගමන් මාර්ග හඳුනා ගැනීම් වලට බාධා කරනවලු.

ජංගම දුරකථන නැති මීමැස්සො පිරිච්ච ලෝකයක් විශ්වයේ අනිත් කෙළවර තියෙනවා. ඒ ලෝකෙ මිනිස්සු පණිවිඩ හුවමාරු කර ගන්නෙ ටෙලිපති ක්‍රමයෙන්.

අයිසැක් ඇසිමෝව්ගෙ දෙවෙනි පදනම කියවපු අයනම් දන්නව ඇති විශ්වයේ අනිත් කෙළවර හොයා ගත්තෙ කොහොමද කියලා. ඒකට යොදා ගත්ත ඉඟි වැකිය තමයි "වෘත්තයකට කෙළවරක් නෑ" කියන එක. කාලය සරල රේඛීය දෙයක්. සරල රේඛීය සඥාවක් සංඛාත විෂයයට රූපාන්තර කළාම ඒක වෘත්තාකාර වෙනවා (Transform to Frequency domain). හීරෝ නකමුරා කාල අවකාශය වක්‍ර කලේ ඒ විදිහටද ?

අතීතය වර්තමානය අනාගතය හා පිහිටලා තියෙන්නෙ සම ද්විපාද ත්‍රිකෝණයකලු. ඒ කියන්නෙ අතීතයේ ඉඳන් වර්තමානය හරහා අනාගතයට යනවට වඩා ඉක්මනින් අතීතයේ ඉඳන් අනාගතයට යන්න පුළුවන්ලු. බර්මියුඩා ත්‍රිකෝණය කියන්නෙ සම ද්විපාද ත්‍රිකෝණයක්. හැබැයි විශ්වයේ අනිත් තැන් වලට වලංගු ත්‍රිකෝණමිතික අනුපාත බර්මියුඩා ත්‍රිකෝණෙදි අවලංගු වෙනවා. ගුවන් යානා , නැව් වලට පාර හොයා ගන්න බැරුව මංමුලා වෙන්නෙ ඒකයි.

අනන්තයට යන පාර දිගේ යනකොට මංමුලා වුණොත් පාර අහ ගන්න වෙන්නෙ ප්‍රාග් ඓතිහාසික කුරුමිණියෙක්ගෙන්. ඩයිනසෝරයො කොච්චර හිටියත් උන් පාර දන්නෙ නෑ.

ඩයිනසෝරයො වඳ වෙලා ගියෙත් ජංගම දුරකථන හින්දා. ඩ‍යිනසෝරයො ලොකු ලොකු සයිස් ජංගම දුරකථන පාඉච්චි කරපු හින්දා මී මැස්සො තරහ වෙලා හඳට ගියා. හඳේ ආවාට හැදිලා තියෙන්නෙ මී මැස්සො ජනාවාස හදපු තැන්. ඩයිනසෝරයො වඳ වෙලා ගියාට පස්සෙ මී මැස්සො ආයෙමත් පෘතුවියට ආවා. ඒ වුණාට හඳේ ගුරුත්ව බලයයි ආන්තරීක්ෂ කිරණ වල බලපෑමයි හින්දා මී මැස්සො හිටපු ප්‍රමාණයෙන් 1/1.61803399 වෙනකම් පොඩි වෙලා ආපහු පෘතුවියට එනකොට.

හැබැයි මමනම් හඳට ගියොත් ආයෙ පෘතුවියට එන්නෙ නෑ නෑ නෑ නෑමයි.

[ 23 - Jul - 2011 ]

ඊට පස්සෙ වෙච්ච දේ ?

2011-07-17T08:01:00.004+05:30

හිතන්න පුළුවන්ද මේ ෆොටෝ එක අරන් මොහොතකට පස්සෙ වෙච්ච දේ ?

[ 17 - Jul - 2011 ]

ෆ්‍රයි එන්ඩ් || FRI + END

2011-07-12T21:01:00.003+05:30

මිතුරු තුමෝ දුක සැප දෙකෙහිම......... පැවති

බිතු සිතුවම් රූ මෙන් අව පැහැ..........ගැනෙති

විහිඟුම් කුලෙන් යුතු උතුමෝ.........අබිමනැති

දිවිහිමි කොටත් නොතරම් කම්..නොමකෙරෙති

මිතුරු මිතුරියෝ පිලිබදව ඇති කරගන්නා බලාපොරොත්තු, විශ්වාසය වැඩි වුණාම එක පොඩි දෙයකට පුළුවන් මහා කළකිරීමක් ඇති කරන්න. ඒ කළකිරීම බෝම්බයක් වගේ පුපුරන්න අවශ්‍ය වෙන්නේ චුටිම චුටි තරහ සිතුවිල්ලක් විතරයි.

දීප්ස්ගේ ලිපියකින් උපුටා ගන්න ලදී

[ 12 - Jul - 2011 ]

භූත ගුණේගේ තුන්මස් සමරුව

2011-06-23T01:33:00.006+05:30

මහා වීර දේශ බන්ධු භූත ගුණේ දැයෙන් සමු ගත්තෙ මීට මාස තුනකට කලින්. භූත ගුණේ ගැන අහල නැත්තන් සඳරු ලියපු භූත ගුණේගේ ජීවිත කතාව කියවලා ඉන්න .

වල් අලි පහරකට ලක්වෙලා දැයෙන් සමුගත්තත් භූත ගුණේගේ කතාව එතනින් ඉවර නෑ. මෙන්න ඊට පස්සෙ වෙච්ච දේ.

===

භූත ගුණේගේ මරණය දැනිලා
සක්කර පස්සත් උණු වූවා.
ප්‍රයිවට් රියදුරු මාතලි කැඳවා
ගුණේව ගෙන එන්නට කීවා

සක් ආරක්ෂක භටයින් සමඟින්

මාතලි ලක් දෙරණට ආවා

වදෙන් පොරෙන් දෙව් රියට නංවලා

ගුණේව දෙව්ලොව ගෙන ආවා

දෙව්ලොව වටපිට විසිතුරු දැකලා

ගුණේගෙ ඇස් දෙක උඩ ඉඳුනා

මාව ගෙනාවේ කොළොම් පුරේටද ?

ගුණයා දෙයියෙක්ගෙන් ඇහුවා

නෑ බොල ගුණයෝ මේකයි දෙව්ලොව

දෙයියා ගුණේට පැවසූවා

කොළොම් පුරෙත් මේ වාගෙම වෙන්ටැති

භූත ගුණේ තනියම හිතුවා

පවස නිවන්නට අමුර්ත බඳුනක්

භූත ගුණේ වෙත පිරිනැමුණා

රා පොල් කට්ටක් මීට සැපයි මට

ගුණයා හෙමිහිට මිමිණූවා

ෆේෂල් කරලා හැඩ වැඩ දමලා

ගුණේට දිව සළු ඇන්දවුණා

මේව එල්ලගෙන ඉන්නේ කොහොමද

භූත ගුණේ දත් මිටි කෑවා

අමුර්ත උගුරක් බීගෙන යනකොට

ගුණේට ඒකේ රස වැටුණා

දෙව්ලෝ කෙළියත් නරකම නැහැ නොවැ

භූත ගුණේ ටික ටික සිතුවා

දෙවියෙක් විලසට දිවුරුම් දෙන්නට

සක්දෙවි ගුණේව කැඳවූවා

අලුතින් දෙවි වන ගුණේ දකින්නට

දෙවිවරු සබයට රැස් වූවා

සක්කර පුත්තර වයිමා දෙයියා

ගුණේට මල් මාලා දැමුවා

නැණ විකලව ගිය මහබඹ රාජා

ගුණේට හව් ආ යූ කිවුවා

පස්ස කූල් වුණ සක්කර දෙයියා

සබයේ මුලසුන වාඩි වුණා

අම්මාපල් මම දෙයියෙක් වෙනවා

ගුණයා දිවුරුම ලෙස කීවා

බිම්බර දහයක් ඒ මහ මරසෙන්

මිලිටරි ආචාරය පෑවා

දේව සභාවේ දෙවියෙක් විලසට

භූත ගුණේ අබිසෙස් ලැබුවා !

ලක්වැසියන් සියළු

දෙනාටම

දේශබන්ධු භූත ගුණේ

දේව පිහිටාරක්ෂාව ලැබේවා !!!

[ 22 - Jun - 2011 ]

චෙස් ලොක්කා ලිබියාවේ

2011-06-13T19:04:00.005+05:30

ලෝක චෙස් ලොක්කා, එහෙමත් නැත්තන් කල්මිකියා ජනරජයේ හිටපු ජනාධිපති තුමා කර්සාන් ඉලිමසිනොව් ( Kirsan Ilyumzhinov ) පහුගිය මාසේ 2600 සම්බුද්ධත්ව ජයන්ති සමරුවට සමගාමීව ලංකාවට ආපු බව මතක ඇති. (මෙතනින් කියවන්න ) . ලංකාවට ආවට පස්සෙ චෙස් ලොක්කා ලංකාවේ හොඳම මිතුරු රටවල් වලටත් යන්න පටන් අරන්. ඔන්න ඊයෙ (12/06/2011) ගියේ දැනට දරුණු යුධමය තත්වයක් පවතින ලිබියාවට.

නේටෝ ගුවන් හමුදා ට්‍රිපෝලි නගරයට බෝම්බ හෙළද්දිත් ඒ ගැන ගාණක්වත් නැතුව කර්සානුයි කර්නල් ගඩාෆියි චෙස් අතක් ඇද ඇද සුහද කතාබහක නිරත වෙන ආකාරය මේ වීඩියෝවෙන් බලන්න

කර්නල් ගඩාෆි සහ කර්සාන් අතර චෙස් තරඟය ජයපරාජයෙන් තොර තරඟයක් ලෙස නිමා වුණා. මේ වගේ චෙස් තරඟ වලදි සාමාන්‍යයෙන් වෙන්නෙම ඕකයි. රාජ්‍යතාන්ත්‍රික ජයපරාජයෙන් තොර තරඟ නිමාවක් (Diplomatic Draw).

ලිබියාවට සාමය උදා වේවා !!!

[ 13 - Jun - 2011 ]

බැච් ෆිට් එක , දත් තිස් දෙක සහ දරුදැරියන්ගේ අපේක්ෂාව

2011-06-12T06:36:00.008+05:30

පහුගිය කාලෙ ආන්දෝලනාත්මක මාතෘකාවක් වෙලා තිබ්බෙ විශ්ව විද්‍යාල වලට සුදුසුකම් ලබපු අයට ලබා දීපු නායකත්ව පුහුණුව. මේ තියෙන්නෙ ඒ පුහුණුව ලබපු පළවෙනි කණ්ඩායමේ දෙන්නෙක් ඒ ගැන ලියපු ලිපි .

1. මධුශාන් පුහුණුවට යන්න පෙර ලියූ ලිපිය

2. මධුශාන් පුහුණුව නිමාවූ පසු ලියූ ලිපිය

1. මාලන් පුහුණුවට යන්න පෙර ලියූ ලියූ ලිපිය

2. මාලන් පුහුණුව නිමාවූ පසු ලියූ ලිපිය

මධුශාන් සහ මාලන් කියන විදිහට එයාල ලබල තියෙන පුහුණුව හොඳ එකක්ලු. ඒ සති තුන සෑහෙන සතුටින් හිටියා කියලයි ලියල තියෙන්නෙ. හැබැයි තවත් සමහර අයටනම් මේ පුහුණුව වේදනාකාරී අත්දැකීමක් වෙලා. මේ තියෙන්නෙ ඒ වගේ දෙයක්

1. නායකත්ව පුහුණුවෙන් අසරණ වූ සෙව්වන්දි

කල් වෙලාව අරගෙන නිසි පරිදි සංවිධානය කරලා කළානම් මේ නායකත්ව පුහුණුව මීටත් වඩා හොඳට හොඳට කරන ගමන් සෙව්වන්දිට වෙච්ච දේ වගේ දේවල් මඟ ඇරගන්නත් තිබුණා කියලයි මට හිතෙන්නෙ.

============

නායකත්ව පුහුණුව කියන මාතෘකාව කරළියට එනකොට ඒත් එක්කම ආපු අනිත් මාතෘකාව තමයි විශ්ව විද්‍යාල වල අමානුෂික නවක වධය. විවිධ බ්ලොග් , බස් සහ ෆෝරම් වල නවක වධය ගැන තිබ්බ සංවාදවලදි නවකවධයට පක්ෂපාතීව අදහස් දක්වපු අය පොදුවේ විවිධ ආකාර වලින් දක්වපු අදහස් 3ක් මම දැක්කා

නවක වධය හින්දා තමයි බැච් ෆිට් එක ඇති වෙන්නෙ
නවක වධය දුන්නෙ නැත්තම් විශ්ව විද්‍යාලත් ඉස්කෝල වගේ වෙනවා
නවක වධය දෙන්න විවිධ තරාතිරම් වල අය සම මට්ටම් කරන්න

මෙන්න ඔය කියන දේවල් ගැන මගේ අදහස

1. නවක වධය හින්දා තමයි බැච් ෆිට් එක ඇති වෙන්නෙ

------------------------

අපි ඉස්කෝලෙ යාලුවොත් එක්ක ෆිට් වුණේ නවක වධයක් හින්දාද ? මමනම් හිතන්නෙ කොල්ලො කෙල්ලො අවුරුදු 4ක් එක තැනක ඉගෙන ගන්නකොට ෆිට්වීම නිරායාසයෙන්ම ඇති වෙනවා. අවුරුදු 4ක් ඕනෙ නෑ. මාසයක් යනකොට ෆිට් වෙන අය ෆිට් වෙලා

2. නවක වධය දුන්නෙ නැත්තම් විශ්ව විද්‍යාලත් ඉස්කෝල වගේ වෙනවා

-----------------------

ඉස්කෝල කියන්නෙ නරක තැනක්ද ? කොහොම වුණත් දැනටමත් විශ්ව විද්‍යාල ඉස්කෝල වලින් වෙනස් වෙලා තියෙන්නෙ. විශ්ව විද්‍යාල තුළ ගුරු සිසු සම්බන්ධතාවය ඉස්කෝල වල ගුරු සිසු සම්බන්ධතාවලට වඩා ඉතාම දුර්වල මට්ටමක තියෙන්නෙ. ඒ තත්වය ඇති වෙලා තියෙන්නෙ නවක වධයෙ අතුරු ප්‍රතිපලයක් විදිහටයි. නවක වධය දෙන කාලය තුලදී සිසුන්ට ආචාර්යවරුන් සමඟ කතාබහ කිරීම තහනම් කිරීමෙන් තමයි ඒක පටන් ගන්නෙ.

නවක වධය ගැන මම මේ කියන දේවල් කාගෙන්වත් ඕපාදූප විදිහට අහපු දේවල් නෙවෙයි. පේරාදෙණිය විශ්ව විද්‍යාලයේ ඉංජිනේරු පීඨයේ අවුරුදු 4ක ශිෂ්‍යයෙක් විදිහට සහ තවත් අවුරුදු 2ක් සහාය කථිකාචාර්යවරයෙකු විදිහට හිටපු හින්දා නවක වධයේ ඇත්ත ස්වරූපය මම අවුරුදු 6ක් තිස්සේ එකිනෙකට වෙනස් කෝණ වලින් දැක්කා. ඒ අත්දැකීම් ඇසුරෙනුයි මම කියන්නෙ විශ්ව විද්‍යාල වල ගුරු සිසු සම්බන්ධතා දුර්වල වෙන්න ප්‍රධානම හේතුවක් නවක වධය.

3. නවක වධය දෙන්න විවිධ තරාතිරම් වල අය සම මට්ටම් කරන්න

------------------------

දත් තිස්දෙක සමමට්ටම් නෑ. බැරි වෙලාවත් දත් 32ම සම මට්ටම් වුණොත් ?

===================

විශ්ව විද්‍යාල වලින් නවක වධය තුරන් කරන බවයි කියන්නෙ. හැබැයි නවක වධය කෙසේ වෙතත් විශ්ව විද්‍යාල පද්ධතියම තුරන් වෙයිද දන්නෙ නෑ.

විශ්ව විද්‍යාල ආචාර්ය වරුන්ගේ වැටුප් ප්‍රශ්නයට විසඳුමක් නැති වීමත්, වැටුප් වැඩි කිරීමක් කෙසේ වෙතත් දැනට තියෙන වැටුපත් නොගෙවා මර්ධනකාරී ලෙස ක්‍රියා කිරීමත් ඔවුන්ගේ උගත්කමට අපහාස වෙන ආකාරයෙන් විවිධ දේවල් කිරීමත් නිසා කළකිරුණු විශ්ව විද්‍යාල ආචාර්යවරුන් පවුල් පිටින් රට අතහැර යන ප්‍රවණතාවයක් මේ දවස් වල ඇති වෙලා තියෙන්නෙ. දැනටමත් සැළකිය යුතු තරම් පිරිසක් රට අතඇරල ගිහින්. මේ ප්‍රශ්නය තව දුරදිග ගියොත් ලංකාවෙ විශ්ව විද්‍යාල පද්ධතිය අඩපණ වෙලා ලංකාවත් විශ්ව විද්‍යාල නැති ලෝකයේ අතලොස්සක් රටවල් වලට එකතු වේවි.

එහෙම වුණොත් ?

දරු දැරියන්ගේ අපේක්ෂාව ?

මේකත් කියවන්න:
---> සිංගප්පූරු ජාතික විශ්ව විද්‍යාලයේ රැග් කරන හැටි
{නවකවධයට පක්ෂපාතී අර ප්‍රසිද්ධ මත තුන මේකෙත් කොමෙන්ටු විදිහට තියෙනවා}

[ 12 - Jun - 2011 ]

කුකුල් හොරා

2011-06-08T19:24:00.001+05:30

අත්තාපල්

මුත්තාපල්

කුකුල් හොරා

කොස්තාපල්

මේ කොස්තාපල් ලංකාවේ පොලිස් කොස්තාපල් කෙනෙක් නොවේ. ලංකාවේ පොලීසියේ අය මේ වගේ සුළු හොරකම් කරන්නේ නැත.

මේ දේ සිද්ධ වෙච්ච රටේදි මේ කුකුල් හොරකමේ වගකීම පැටවුණේ පොලිස් පොඩ්ඩෙක් වන කොස්තාපල් කෙනෙකු පිටය. කුකුල් හොරකමට අණදුන් ආරක්ෂක ලේකම් නිදැල්ලේය. ඒ රටවල් වල හැටි එහෙමය.

ඕං බලමුකො ඒකෙත් හැටි !!!

[ 08 - Jun - 2011 ]

කාලීන මාතෘකා වනාහි මෙන්න මේවාය !

2011-05-29T04:42:00.001+05:30

මගේ ලෝකය ලියන රංගගෙ මහා බ්ලොග් විචාරයෙදි මකර රජදහන ගැන කියල තියෙන්නෙ මෙන්න මේ විදිහට.

"චානක ලියන මකර රජදහන තමා ඊලඟ බ්ලොග් එක. මේකෙත් විවිධත්වයක් තියෙනවා. ගොඩක්ම කාලීන මාතෘකා ගැනතමා ලියල තියෙන්නෙ. ඒ ඇරෙන්න බුවා ඉන්නෙ සිංගප්පූරුවෙ නිසා ඒ පැත්තෙ විස්තරත් ගොඩක්ම ලියල තියෙනව. මේ තියෙන්නේ මකර රජදහනට යන පාර."

අපි බලමු මේ කියන කාලීන මතෘකා මොනවද කියල. ඔන්න කාලීන මතෘකා ඔක්කොම එකම වහලක් යටින්

පූවො ගැන

---------------

1. පූසා ගැන ආසා හිතෙන කතාවක් ?

2. භොරෙන් ෆොටෝ ගන්න ගිහින් ....

3. චෞර බිළාල

4. මේ ජීවන කතරේ - සැප දුක සමබර වේ !!!

5. ලංකාවට පූසො ගෙනාවෙ කවුද ?

6. කොළඹ පූසන්ට කිරි, ගමේ පූසන්ට කැකිරි

7. පනින්න පෙර සිතා බලනු !!!

8. තුන්පත් රෑන්

9 . සෑම ගෙදරකම සිටිය යුතු සත්තු දෙන්නෙක්

10 . කොපි කැට්

11. මගේ නිදහස් දින සිහිනය

12 . ඔබාමාගේ පූස් පොරොන්දුව

13. බිහිසුණු පූසෙක් ( මීයන්ට )

14. මල් මල් පූසා

15. මම ලියපු පළවෙනි බ්ලොග් සටහන (මාතෘකාවක් නැත )

බවුවො ගැන

---------------

1. සංගීතයට ලැදි හොම්බ කලුවන් කන්කලු බවුවෙක්

2. ජනමාධ්‍ය නිදහසට තවත් බාධාවක්

3. තනි වෙන්න ඉඩ දෙන්න මටයි මගේ බලුටයි ...

4. පොඩි ලොකු භේදය.

5. බල්ලොත් එහෙමයි (මලී නඟාට පිළිතුරක්)

පූවො බවුවො දෙගොල්ලන්ම ගැන

---------------

1. කොල්ලා, බල්ලා, කෙල්ල සහ පූසා පිළිබඳ අතිවිශේෂ මකර අධිරාජ කොමිෂම

2. උත්තමාචාරය !!!

අලියො ගැන

----------------

1. මහා සැරය

2. ඔන්න වෙලාව

කොටියෝ ගැන ( LTTE නෙවෙයි )

----------------

1. කොටියා ආවෝ !!!

2. තලගොයි කොටියා

බළල් පවුල ගැන

---------------

1. පවුල් ප්‍රශ්නයක්...

නයෝ ගැන

----------------

1. මිතුරු තුමෝ දුක සැප දෙකෙහිම පැවති

2. නයා x 2

හරක් ගැන

--------------

1. අම්බරුවා යනු ?

2. Beyond Frame ට මගෙනුත් එළකිරි අදහසක්

3. සුභ හරක් අවුරුද්දක් වේවා!!!

4. වලිගය නැති ගොනා.

එළුවො ගැන

--------------

1. දුප්පත් අපගේ බයිසිකලේ

ඌරො ගැන

--------------

1. ගහින් වැටුණු මිනිසාට ඌරා ඇනීම

හාවො ගැන

----------------

1. හා හා හරි හාවෝ ! කැලේ මැදින් ආවෝ !

2. එකමත් එක රටක හිටිය හා පැටියගෙ කතන්දරේ

නරියො ගැන

---------------

1. නරයා සහ මිදි

ගෙම්බො ගැන

---------------

1. ගෙඹි කුමරා

2. සෑම ගෙදරකම සිටිය යුතු සත්තු දෙන්නෙක්

පෙන්ගුයින්ල ගැන

----------------

1. ප්‍රජාතන්ත්‍ර විරෝධී Linux

ඉබ්බො ගැන

---------------

1. මට දැනෙනා ලෙසට මහරජ ඉබ්බාය !!!

මීයො ගැන

--------------

1. ඌරු මීයා

බකමූණො ගැන

----------------

1. අවුල් පාර්ලිමේන්තුව

මාලුවො ගැන

---------------

1. චෙස් ක්‍රීඩාවේ මාලු-මාලු සටන

මදුරුවො ගැන

----------------

1. තෙල් සහ මදුරුවෝ

හැම්ස්ටරයන් ගැන

---------------

1. හැම්ස්ටරයන්ගේ ආදරේ !!!

විවිධ සත්තු වර්ග ගොඩක් ගැන

----------------

1. නොගැලපෙන සත්තු ඉවත් කරනු !!

2. හාවෝ නයෝ සහ කුරුල්ලෝ

3. සෙන්තොස (Sentosa) දී දැකපු සත්තු

4. මැතිවරණ , විභාග සහ XXX

කාලීන මාතෘකා යටතේ ලියා ඇති

සම්පූර්ණ ලිපි ගණන

50යි !!!

[ 29 - May - 2011 ]

මේ මොන මළ විකාරයක්ද ?

2011-05-26T07:11:00.007+05:30

සරසවි වලට සුදුසුකම් ලැබූ සිසුන්ට දෙන නායකත්ව පුහුණුව ගැන ලිපියක් ලියලා කට ගන්න හම්බ වුණේ නෑ. මෙන්න ඉස්කෝල වල විදුහල්පති වරුන්ටත් රන්ටැඹේදි මාස 3ක නායකත්ව පුහුණුවක් ලබා දෙන්න යනවලු. මේ කතාව මුලින්ම ඇහිච්ච වෙලේ මට හිතුනේ මේක ආණ්ඩුවට විරුද්ධව මඩක් කියල . හැබැයි කතාව ඇත්ත වගේ. එකිනෙකට විරුද්ධ දේශපාලන මතිමතාන්තර දරන වෙබ් අඩවි තුනක්ම මේ ගැන එක හා සමාන විදිහටයි වාර්තා කරල තියෙන්නෙ

මේ බලන්නකො . ලිපි වලට දාල තියෙන මාතෘකා වෙනස් වුණත් මේ ලිපි තුනේම අන්තර්ගතය එක හා සමානයි

Lanka Enews ලිපිය
Lanka CNews ලිපිය
Lanka Truth ලිපිය

ඒවයෙ තියෙන හැටියට විදුහල්පතිවරයෙක්ට තාප්ප උඩින් පණින්න, ළමයි එක්ක රේස් දුවන්න වගේ දේවල් කරන්න පුළුවන් වෙන්න ඕනෙලු. එහෙම කරන්න බැරි දුර්වල විදුහල්පතිවරුන්ට ලු මේ පුහුණුව දෙන්නෙ. මෙහෙම කියන්නෙත් සාමාන්‍ය කෙනෙක් එහෙම නෙවෙයි. මේ කතාව කියල තියෙන්නෙ අධ්‍යාපන අමාත්‍යංශයේ ලේකම්.

ඉස්කෝල වල විදුහල්පතිවරු කියන්නෙ ගොඩක් වෙලාවට වයස 40-50 කට්ටිය. ඒ අයට මේවා කරන්න පුළුවන්ද . විදුහල්පතිවරියන්ටත් තාප්ප උඩින් පනින්න උගන්නනවද ?

ඔයිට වඩා හොඳ නැද්ද දැන් ඉන්න විදුහල්පති වරුන්ට කරදර නොකර ඒ අයට විශ්‍රාම වැටුපක් දීල ආමි එකේ බ්‍රිගේඩියර්වරුන්ව,කර්නල් වරුන්ව එහෙම ඉස්කෝල වල විදුහල්පති වරු විදිහට පත් කොළානම්.

ප.ලි
===

විදුහල්පති වරුන්ට මොකක් හරි පුහුණුවක් දෙන්නම ඕනෙනම් දෙන්නකො අධ්‍යාපන සහ ළමා මනෝ විද්‍යාව ගැන හොඳ පුහුණුවක්

[ 26 - May - 2011 ]

හැම්ස්ටරයන්ගේ ආදරේ !!!

2011-05-22T18:14:00.000+05:30

හැම්ස්ටර් මැක්බත් සහ හැම්ලට්

[ 22 - May - 2011 ]

මාර මාරුව ඔබට කොහොමද ?

2011-05-22T10:28:00.006+05:30

අසව් අසව් !!!

විශ්වය ආරම්භයේ පටන් මේ දක්වා කාලයක් පරනිම්මිත වසවර්තිය ස්වකීය වාසභවන කොටගත් සීටීකූ මාරයා (සිකුරිටි මාරයා නොවේ ) හෙට මධ්‍යම රාත්‍රී 12.00ට යෙදෙන අසුභ මොහොතින් නව වාසභවනක් වන ස්වනිම්මිත වසවර්තියට අරක්ගනු ඇති. සීටීකූ මාරයා සමඟ මාරයාගේ දූවරුන් තිදෙනාත් දසබිම්බරක් මාර සේනාවත් ස්වනිම්මිත වසවර්තියට මාරු වී යනු ඇති.

සීටීකූ මාරයා, මාරයන්ගේ පාරම්පරික වාසභවන වන පරනිම්මිත වසවර්තියෙන් ඉවත්වී ගොස් දිව්‍යලෝක ආයතන අනුපිළිවෙල ( Organizational Hierarchy ) කඩාකප්පල් කර දැමීම පිළිබඳව පරනිම්මිත වසවර්තියට පහළින් ඇති නිර්මාණ රතියෙන් හා ඉහළින් ඇති බ්‍රහ්ම පාරිසධ්‍යයෙන් බරපතල විරෝධතා එල්ල වන බවද සැළයි.

මාර මාරුව ලග්න 12කට අසුභයි !!!

ප.ලි

====

සීටීකූ මාරයා ඇතුළු පිරිස ඉවත්ව යාමෙන් පුරප්පාඩු වන පරනිම්මිත වසවර්තිය කුළියට හෝ බද්දට දීමට තිබේ. වැඩි විස්තර සඳහා ශක්‍ර දේවේන්ද්‍ර අමතන්න

ප.ප.ලි
======
මේකත් කියවන්න
බලංගොඩ ආනන්ද මෛත්‍රී නාහිමියන් මාරයා ගැන පළකල අදහස්

[ 22 - May - 2011 ]

වීරයෝ

2011-05-22T00:25:00.002+05:30

අද මැයි 22 වෙනිදා ජාතික වීර දිනය. මේ තියෙන්නේ ප්‍රසිද්ධ චිත්‍රපටි කීපයක වීර චරිත නිරූපණය කරන ප්‍රධාන නළුවන්ගේ පින්තූර

අචිලස් - Troy චිත්‍රපටිය

ආතර් රජු - King Arthur චිත්‍රපටිය

ජෙනරාල් මැක්සිමස් - Gladiator චිත්‍රපටිය

ස්පාර්ටන් - 300 චිත්‍රපටිය

ස්පාර්ටකස් - Spartacus: Blood and Sand චිත්‍රපටිය

තෝර් - Thor චිත්‍රපටිය

තුන්සිංහලය එක්සේසත් කළ

ශ්‍රේෂ්ඨ නරපති දුටුගැමුණු

සුරංගනා ලොවින් ඇවිත් චිත්‍රපටිය

ජෙනරාල් මැක්සිමස් ගැන කලින් ලියූ ලිපියක්

රොබින්හුඩ්, කඩුකාරයෝ සහ ජෙනරාල්වරු

[ 22 - May - 2011 ]

සිංගප්පූරුවේ ජාතික සේවය සහ ශ්‍රීලංකාවේ නායකත්ව පුහුණුව

2011-05-21T22:58:00.010+05:30

සිංගප්පූරු ජාතික සේවකයන් පිරිසක්

මගේ කලින් බ්ලොග් සටහනකට ප්‍රතිචාරයක් දක්වපු වීර පුරන් අප්පු මෙන්න මෙහෙම දෙයක් කියල තිබ්බා

"එක පරම්පරාවක් ඇතුලත ඌන සංවර්ධිත තත්වයක ඉඳලා සංවර්ධිත රටක් බවට පත් වෙච්ච එකම රට සිංගප්පූරුව මම දන්නා විදියට. එක කියන්න ලේසි උනාට කරන්න කොච්චර අමාරු වෙන්න ඇතිද...? අනික් ඒවා කෙසේ වෙතත් මිනිස්සුන්ගේ ආකල්ප වෙනස් කිරීම කොයි තරම් නම් අමාරු වෙන්න ඇතිද....? විශේෂයෙන්ම එක genaration එකක් තුළ. "

මේකට උත්තරය විදිහට මම දකින්නේ සිංගප්පූරුවේ ජාතික සේවය (National Service). වයස 18 සම්පූර්ණ කරන සෑම(පිරිමි පමණයි ) සිංගප්පූරු ජාතිකයෙක්ම සහ සෑම ස්ථීර පුරවැසියෙක්ම එයින් පසුව අනිවාර්යයෙන්ම අවුරුදු 2ක් ජාතික සේවයේ යෙදිය යුතුයි. විශ්ව විද්‍යාල වලට ඇතුලත් වීම හෝ වෙනයම් රැකියාවක් කිරීමට පෙර මේ අවුරුදු දෙක අනිවාර්යයෙන්ම සම්පූර්ණ කළ යුතුමයි

ජාතික සේවය සඳහා වයස සම්පූර්ණ කරන සියළු දෙනාම රට පුරා හමුදා කඳවුරු වලට අනුයුක්ත කරනවා. ඉන්පසුව අවුරුදු 2ක් පුරාවට සතියට දින 5 බැගින් ඔවුන් ජාතික සේවයේ නිරත විය යුතුයි. සති අන්ට දිනවලදී ඔවුන්ට නිවෙස් වලට යාමට අවසර ලැබෙනවා. සෑම සිකුරාදාවකම සහ ඉරිදාවකම හවස් කාලයේදී හමුදා ඇඳුම් වලට සමාන ඇඳුම් වලින් සැරසුණු ජාතික සේවක යෞවනයන් රංචු පිටින් පොදු ප්‍රවාහන සේවා වල ගමන් කරන එක සිංගප්පූරුවේ සාමාන්‍ය දර්ශනයක්.

මේ අවුරුදු දෙක ඇතුළතදී ඔවුන්ට ලැබෙන පුහුණුව පූර්ණ හමුදාමය පුහුණුවක් නෙවෙයි. හමුදාමය පුහුණුවක යම් යම් අංගත් ඊට ඇතුළත් වුණත් පූර්ණ හමුදාමය පුහුණුවක් ලැබෙන්නෙ ඒ අවුරුදු දෙක සම්පූර්ණ කළාට පස්සෙ තවදුරටත් හමුදාවේ රැඳෙන්න කැමති කට්ටියට විතරයි. අනිත් අය විශ්ව විද්‍යාල වලට සහ වෙනත් රැකියා වලට එකතු වෙනවා

මේ අවුරුදු දෙකක ජාතික පුහුණු කාලය අතරතුර ඔවුන්ට යහපත් ශරීර සෞඛ්‍යයක් රැකගැනීමට අවශ්‍ය ව්‍යායාම් පුහුණුව, දේශපාලනය, පරිගණක තාක්ෂණය, කලමණාකරණය වගේ පරාසයක විහිදුණු පුහුණුවක් ලබා දෙනවා. ඊට අමතරව ඔවුන්ට රට ගැන පූර්ණ අවබෝධයක් ලබා දෙනවා. ඒ පොත පතේ දැනුමෙන් නෙවෙයි. ඔවුන්ව වරායවල්, ගුවන් තොටුපොලවල් කෞතුකාගාර, විශ්ව විද්‍යාල වගේ තැන්වල ශ්‍රම දායකත්වයකට අනුයුක්ත කිරීම මගිනුයි ඔවුන්ට රටේ ආයතන වල ක්‍රියාකාරීත්වය ගැන ප්‍රායෝගික පුහුණුවක් ලබා දෙන්නේ.

මේ අවුරුදු දෙකක පුහුණුව නිම කරලා විශ්ව විද්‍යාල වලට ඇතුලත් වෙන අය තුළ සෑහෙන පෞරුෂයක් සහ සංවිධානාත්මක ශක්තියක් තියෙනවා. විශ්ව විද්‍යාල වල ශිෂ්‍ය සංගම් හා ක්‍රීඩා කණ්ඩායම් වල නායකත්වය දරන්නේ විශ්ව විද්‍යාලයේ පළමු වසර සිසුන් . ලංකාවෙනම් එවැනි තනතුරු දරන්නේ අවසන් වසර වල සිසුන්නෙ. නමුත් මෙහේ සිසුන් පළමු වසරට ඇතුළත් වෙනකොටම ඔවුන්ට එවැනි තනතුරු දැරීමේ හැකියාව ලබා දීලයි තියෙන්නෙ.

මූලික අවුරුදු දෙකේ පුහුණුවෙන් පස්සෙ වයස 35 සම්පූර්ණ වෙනකම් හැම අවුරුද්දකටම සති දෙක බැගින් වූ කාලයකට ඔවුන් නැවතත් කඳවුරු වලට යා යුතුයි. ඒ සති දෙකක කාලයේදී කෙරෙන්නේ කලින් ඉගෙන ගත්ත දේවල් නැවත මතක් කර දීමක්. ( අමතක වූ ශාරීරික ව්‍යායාම් එහෙම වගේ දේවල් )

====

මේ දවස් වල ලංකාවේ ආන්දෝලනාත්මක ප්‍රවෘත්තියක් තමයි විශ්ව විද්‍යාල වලට ඇතුළත් වෙන්න ඉන්න සිසුන්ට ලබාදීමට නියමිත සති 3ක නායකත්ව පුහුණුව. සමහරු මේක හොඳ දෙයක් කියන අතරේ තවත් සමහරු මේක නරක දෙයක් විදිහටයි දකින්නේ. මේ පුහුණුවට විරුද්ධව ශ්‍රේෂ්ඨාධිකරණයේ මානව අයිතිවාසිකම් නඩුවක් පවා දාලයි තියෙන්නෙ.

ලංකාවේ සිසුන්ට ලබාදෙන්න යන සති තුනේ පුහුණුවේ ස්වරූපය ගැන තවම ආණ්ඩුව හෙළි කරලා නැහැ. ලංකාවේ මෙවැනි දෙයක් වෙන්න යන්නෙ ලෝක ඉතිහාසයේ පළවෙනි වතාවටයි. ඒක හින්දා මේ පුහුණුවේ ස්වරූපය ගැන ගොඩක් දෙනා තවම දන්නෙ නෑ . එස්.බී දිසානායක ඇමතිතුමානම් කියන්නෙ සිසුන්ට දත් මදින ආකාරය ගැන පුහුණුවක් දෙනවා කියලයි.

හැබැයි මට ලැබුණු අතිශය රහසිගත බුද්ධි වාර්තා දෙකකට අනුවනම් මේ පුහුණුව දත් මැදීමේ පුහුණුවෙන් ඔබ්බට යන පුහුණුවක්. ශාරීරික ව්‍යායාම් සහ කාල කළමණාකරණ පුහුණු වලට අමතරව ගැහැණු ළමයින්ට සහ පිරිමි ළමයින්ට අති විශේෂ පුහුණු 2ක් ලබා දීමට නියමිතයි

මේ නායකත්ව පුහුණුව පැවැත්වෙන සති 3ක කාලය පුරාවට කඳවුරේ සිටින සියළුම දෙනාට (දාහකට දෙදාහකට විතර පිරිසකට ) ආහාර පාන උයා දීම වගකීම පැවරෙන්නේ කඳවුරට සහභාගි වෙන ගැහැණු ළමයින්ටයි. උයන්න දන්නෙ නැති ගැහැණු ළමයින්ට උයන කටට රහට උයන ආකාරය කියා දෙනු ඇති.ගැහැණු ළමයි උයන අතරේ පිරිමි ළමයින්ටත් නිකං ඉන්න ලැබෙන්නේ නෑ. ඒ අයට කැලේ ගිහින් දර කඩාගෙන ඒම. දර පලා දීම. පොල් ලෙලි ගසා දීම ආදිය ගැන පුහුණුවක් ලැබෙනු ඇති.

පුහුණු කඳවුරු ව්ලට සහභාගි වෙන නංගිලා මල්ලිලා හෙට සිට සති තුනක් මේ පුහුණුව අත්දකීවි. පුහුණුව ඉවර වුණාට පස්සෙ ඔබේ අත්දැකීම් ගැන බ්ලොග් සටහන් ලියා අපිත් එක්ක බෙදා හදා ගන්නත් අමතක කරන්න එපා

හෙට දින නායකත්ව පුහුණුවට යන නංගිලාට සහ මල්ලිලාට

මකර අධිරාජයාගෙන් උණුසුම් සුභපැතුම් !!!

ප.ලි

===

කවුරු කොහොම කිවුවත් ඔය නායකත්ව පුහුණුවෙන් ලැබෙන දේවල් අපතේ යන එකක් නැති වේවි. ඔයවැනි කඳවුරු කිහිපයකට සහභාගී වී ලබපු අත්දැකීම් ඇසුරෙනුයි මම කියන්නෙ. ලෝකයේ විනයගරුකම සහ විශිෂ්ඨතම හමුදාවෙන් ඔබ ලබන සති 3ක නායකත්ව පුහුණුව සුපිරි අත්දැකීමක් වේවි.

[ 21 - May - 2011 ]

සංගීතයට ලැදි හොම්බ කලුවන් කන්කලු බවුවෙක්

2011-05-21T15:36:00.003+05:30

Play with Sounds

නිලුපුල් දෑසින් මදෙස බැලූ ...
හොම්බ කලූ නුඹ මගේ කලූ....

[ 21 - May - 2011 ]

චෙස් ලොක්කා ලංකාවේ

2011-05-20T21:38:00.005+05:30

ලෝක චෙස් සංගමයේ (FIDE) සභාපති Kirsan Ilyumzhinov මේ දවස් වල ශ්‍රී ලංකාවේ සංචාරයක නිරත වෙනවා. දැන් ලෝක චෙස් සංගමයේ සභාපති ධුරය දරන ඔහු මීට පෙර කල්මිකියා ජනරජයෙ (Republic of Kalmykia) ජනාධිපතිවරයා. කල්මිකියා ජනරජය කියන්නෙ සුවිශේෂී රටක් . ඒක තමයි යුරෝපයේ තියෙන එකම බෞද්ධ රාජ්‍යය.

හිටපු ජනාධිපති වත්මන් සභාපති වරයා ලංකාවේ සංචාරය අතරතුර විවිධ චෙස් ක්‍රියාකාරකම් කීපයකටම සහභාගි වීමට නියමිතයි. හැබැයි ඔහුගේ ශ්‍රී ලංකා සංචාරයේ ප්‍රධාන අරමුණ චෙස් නෙවෙයි. 2600 සම්බුද්ධත්ව ජයන්තිය වෙනුවෙන් කල්මිකියා සමූහාණ්ඩුවෙන් ලංකාවට පැමිණි බෞද්ධ දූත පිරිසක් එක්කයි ඔහු ඇවිල්ලා ඉන්නෙ. සභාපති වරයා ඇතුළු පිරිස ඉදිරි දින කීපයේ ලංකාව පුරා පූජනීය සිද්ධස්ථාන රාශියක සංචාරයක නිරත වනු ඇති.

[ 20 - May - 2011 ]

මහා සැරය

2011-05-20T07:15:00.011+05:30

කුමාරතුංග මුනිදාස ශූරීන්ගේ හීන්සැරය පොත කියවල තියෙන අයනම් දන්නව ඇති ඇයි අලියා කසුට්ටාට බය කියල. ඒ කසුට්ටා අලියගේ හොඬවැලේ රිංගපු හින්දයි.

මේ තියෙන්නෙ කසුට්ටාගෙ ලොකු අයියා කිඹුලා අලියෙකුට මහා සැරයක් දාන හැටි. කිඹුලාට අලියගෙ හොඬැවැලේ රිංගන්න හැකිවෙයිද ?

ප.ලි

=====

අලි සෙල්ලං බලන්න ආපු එකේ කේක් කෑල්ලකුත් කාලම යන්න. මෙවර කේක් සඳහා අනුග්‍රාහක දායකත්වය ශසීන්ද්‍ර වීරසිංහ මල්ලියාගෙන්

පහුගිය අවුරුදු වල කේක් ගෙඩි වල ඉතුරු වෙච්චත් තියෙනවා.

2010 කේක් එක
2009 කේක් එක

[ 20 - May - 2011 ]

අත්තානං උපමංකත්වා

2011-05-18T23:48:00.011+05:30

කෙනෙක් මියයාම ජීවත්ව සිටින්නන්ට ශෝකජනක අවස්ථාවක්. ශෝකය තුනී කර ගන්න බුදු දහම පාවිච්චි කරන්න.

අත්තානං උපමංකත්වා

තමාව උපමාවට ගන්න

මම හිතන්නෙ අපි කවුරුත් කැමති නැහැ අපි මිය ගියාම අනිත් අය අපි වෙනුවෙන් ශෝක කරනවට. එක නිසා තමාවම උපමාවට ගන්න.

ඊයේ අප අතරින් වෙන්ව ගිය අපේ සහෝදර බ්ලොග්කරු දිලුම් (ඉලංදාරියා) සොහොයුරා තමගේ දෑතින්ම අකුරු කළ මේ අදහසත් කියවන්න

http://ilandhariaya.blogspot.com/2010/07/blog-post.html

දිලුම්

[ 19 - May - 2011 ]

මගේ ඔලු ගෙඩිය

2011-05-16T11:41:00.000+05:30

මගේ වැසිකිළි යාමෙන් පසු අත් සෝදනවාද ? ලිපිය කියවපු කීප දෙනෙක්ම මගේ ඔලුගෙඩියෙ පින්තූර ඉල්ලලා තිබ්බා. ඔන්න මගේ ඔලු ගෙඩියෙ පින්තූර.

ඉදිරි පෙනුම

පැති පෙනුම

ඉහළින් බලන විට පෙනුම

පිටුපස පෙනුම

සසඳ සසඳ බැලීම සඳහා
කොණ්ඩය වැවී ඇති විට පෙනුම

[ 16 - May - 2011 ]

අසූහාරදාහක් ධර්මස්කන්ධය ගිගා බයිට් 5කින්

2011-05-16T02:42:00.003+05:30

ථෙරවාද ත්‍රිපිටකය (සිංහල තේරුම්ද සමඟ) මෙතනින් බාගත කර ගන්න . කොටස් වශයෙන් බාගත කරගත හැකියි. සම්පූර්ණ ප්‍රමාණය ගිගාබයිට් 5කට ආසන්නයි.

තමහට වැඩ කැමැත්තෝ

තිසරණයෙහි පිහිටත්වා !!!

සැමටම ප්‍රීති වෙසක් !!!

[ 15 - May - 2011 ]

අනාවැකි දෙකක් !!

2011-05-15T03:37:00.004+05:30

1. තිලකරත්න ඩිල්ෂාන් එදාමෙදාතුර ලංකාවේ බිහි වෙච්ච සාර්ථකම ක්‍රිකට් නායකයා වෙනවා. ඊලඟ ලෝක කුසලානය දිනන්නෙ ලංකාව.

2. මහින්ද රාජපක්ෂ ලංකාවේ ජනාධිපතිකම දරන්නෙ තව උපරිම අවුරුදු 3යි. එයින් පස්සෙ පාලනයේ මාරුවක් වෙනවා.

බලමු මේ අනාවැකි දෙක හරි යයිද කියලා.

Disclaimer

=======

අනාවැකි වල නිවරද්‍යතාවය පිළිබඳව වගකියනු නොලැබේ !

[ 15 - May - 2011 ]

නොගැලපෙන සත්තු ඉවත් කරනු !!

2011-05-14T18:00:00.008+05:30

ලෝක කුසලානෙ අන්තිම තරඟෙන් පැරදුනත් ලංකාව ඉන්දියාවට ක්‍රිකට් වලින් දෙවෙනි වෙන්න කැමති නෑ. ( එහෙම නැතුවත් බෑනෙ ආශ්චර්යය සඳහා යන ගමනෙදි ). ඒක හින්දා ඔන්න ඉන්දියාවෙ IPL එකට තරඟයක් විදිහට SLPL කියල එකක් පටන් ගන්න යනවා.

පළාත් 6කින් කණ්ඩායම් හයක්ලු. ඒ ඒ පළාත් වල කණ්ඩායම් වලට සත්තුන්ගෙ නම් තමයි දාල තියෙන්නෙ.

රුහුණ රයිනෝස් (Ruhuna Rhinos)
බස්නාහිර බෙයාර්ස් (Basnahira Bears)
කඳුරට කයිට්ස් (Kandurata Kites)
ඌව යුනිකෝන්ස් (Uva Unicorns)
වයඹ වුල්ව්ස් (Wayamba wolves)
උතුර ඔරික්සස් (Uthura Oryxes)
නැගෙනහිර නාගස් (Nagenahira Nagas)

ඔන්න ඔතන පොඩි නොගැලපීමක් තියෙනවා. පළාත් වල නම් සිංහලෙන් කියල සතාගෙ නම ඉංග්‍රීසියෙන් කිවුවම ඒක මොකක්දො මොකක්දො වගේ. ඒක හින්දා ඒ ඒ පළාත් වලට ගැලපෙන විදිහට සත්තුන්ගෙ සිංහල නම් ටිකකුත් දැම්මනම් මරේ මරු. වැඩේට ගැලපෙන නම් මේ තියෙන්නෙ.

කඳුරට කබරගොයිස්
නැගෙනහිර නරියෝස්
උතුර උලමෝස්
රුහුන රිලව්ස්
ඌව ඌරෝස්
වයඹ වවුලෝස්
බස්නාහිර බලු කුක්ස්.

තනි සිංහලෙන් නම් තිබ්බම සුද්දන්ට තේරෙන්නෙ නැහැනෙ . පවුනෙ. ඒක හින්දා එයාලට යාන්තමට තේරෙන්න අන්තිමට එස් අකුරක් විතරක් දාමු. SLPL වල දේශීයත්වය රැක ගනිමු !

මාධ්‍ය දායකත්වය - ලසිත් බෙනරගම

ප:ලි
==
බැන්කි මූන් එක්ක තරහක් තියෙනවනම් බස්නාහිර බකමූන්ස් කියල වුණත් දාන්න පුළුවන්

[ 14 - May - 2011 ]

මෙන්න තවත් ඡන්ද ප්‍රතිපලයක්

2011-05-08T18:48:00.005+05:30

මම කලින් කිවුවනෙ පහුගිය සති දෙකේ සිංගප්පූරුවේ මැතිවරණ උණුසුම ඉහළ ගිහින් තිබ්බ හැටි. ඔන්න ඊයෙ ඒක ඉවරයි . ප්‍රතිපලය ආණ්ඩු පස්සයට මන්ත්‍රීවරු 81 යි විපස්සයට මන්ත්‍රීවරු 6 යි. මෙච්චර ගොඩක් තිබිලත් 1965 න් පස්සෙ බිහි වෙච්ච දුර්වලම ආණ්ඩුවලු. පවූඌඌඌඌ කියල හිතෙනවා නේද ?

රජ්ජුරුවෝ උඩයි උඩයි

මේකත් බලන්න

අවුල් පාර්ලිමේන්තුව

[ 08 - May - 2011 ]

සිංගප්පූරුවේ මැතිවරණ උණුසුම

2011-05-01T08:10:00.004+05:30

පසුගිය 19 වෙනිදා මධ්‍යම රාත්‍රියේදී අතිගරු ජනාධිපති නාදන් මැතිතුමා විසින් සිංගප්පූරු පාර්ලිමේන්තුව විසුරුවා හැරුණා. එයින් පසුව පසුගිය 27 වැනිදා 14 වැනි පාර්ලිමේන්තු මහා මැතිවරණයට නාම යෝජනා කැඳවුණු අතර මැතිවරණය මැයි 7 වෙනිදා පැවැත්වීමට නියමිතයි.

සිංගප්පූරු පාර්ලිමේන්තුවේ ආසන ගණන 87යි . එයින් ආසන 82ක් සඳහා මැතිවරණය පැවැත්වෙනවා. ඉතිරි ආසන වල අපේක්ෂකයන්ට නිතරඟ ජයක් ලැබිලා .

පාර්ලිමේන්තුව

ලංකාවෙ වගේ නෙවෙයි මෙහේ පාර්ලිමේන්තුව විසුරුවා හැරලා සතියක් ඇතුළත මැතිවරණය පවත්වන්න ව්‍යවස්ථාවෙන් ප්‍රතිපාදන සපයල තියෙනවා. ඒ වගේ සතියක් ඇතුළත මැතිවරණ පවත්වපු අවස්ථාත් ඉතිහාසයේ තියෙනවාලු. මේ පාරනම් පාර්ලිමේන්තුව විසුරුවා හැරීමේ සිට මැතිවරණ දිනය දක්වා දවස් 17ක් තියෙනවා. යන්තම් සති දෙකයි.හරිහමන් මැතිවරණ ප්‍රචණ්ඩ ක්‍රියාවක් සැළසුම් කරන්නවත් කාලෙ මදි.

එ වුණාට කාලෙ මදි කියලා පසුබාන්නෙ නැතුව පාලක මහජන ක්‍රියාකාරී පක්ෂයනම් (Peoples Action Party ) දැවැන්ත මැතිවරණ ප්‍රචාරයක් ආරම්භ කරලා . බලන්න පින්තූර ටික

හිටපු අගමැති සහ අනාගත අගමැති

ලංකාවෙ වගේම තමයි
ලයිට් කණු හරිම ප්‍රයෝජනවත්

මැතිවරණ ප්‍රචාරක රථයක්

ලයිට් කණු වල වගේම මාර්ග සංඥා කණු වලත් බැනර් එල්ලීම නිසා මේ වගේ හාස්‍යජනක දර්ශනත් මැවිලා තිබ්බා

මහජන ක්‍රියාකාරී පක්ෂය නවත්වනු !!!

කොහොම වුණත් මේ පාරත් මහජන ක්‍රියාකාරී පක්ෂය නවත්වන්න බැරිවෙයි. විපස්සය සෑහෙන දුර්වල බවයි පෙනෙන්නේ.

පසුගිය වසර තුළ බදු බර හා ජීවන වියදම සෑහෙන්න ඉහළ ගිය බවට විපස්සය චෝදනා කළත් ඔවුන් පැහැදිළි විකල්ප ප්‍රතිපත්තියක් ඉදිරිපත් කරලා නෑ. ඒ අතරේම ආණ්ඩුව විසින් ශ්‍රීලංකා මොඩලයේ පරිගණකාශ්‍රිත ඡන්ද මංකොල්ලයකට සූදානම් වන බවටත් චෝදනාවක් තියෙනවා ( කාටද ආඩම්බර ? ). ඒකනම් අර බැට් කරන්න බැරි වුණේ පිච් එක ඇද හන්දා වගේ කතාවක් වෙන්න ඇති.

මේවත් කියවන්න

1. අපායේ යමවරණ උණුසුම
2. අවුල් පාර්ලිමේන්තුව
3. ලෝකෙ වංචනිකම මැතිවරණය

[ 01 - May - 2011 ]

වැසිකිළි යාමෙන් පසු අත් සෝදනවාද ?

2011-04-26T09:17:00.002+05:30

මම පහුගිය දවසක බාබර් සාප්පුවට ගිහින් කොණ්ඩෙ තට්ටෙ ගාන පොරොත්තු ලැයිස්තුවෙ (Waiting List) ඉන්න අතරෙ එතන තිබ්බ සඟරා වගයක් බල බල හිටියා. එක ලිපියක් තිබුණා ලෝකෙ අකාර්යක්ෂමම දේවල් 10යෙ ලැයිස්තුවක්. මේ දේවල් අකාර්යක්ෂමයි කියන්නෙ මේවායින් බලාපොරොත්තු වෙන කාර්යය ඉටු වෙන්නෙ නැති හින්දයි. සමහර ඒවායින් ඉටුවෙන්නෙ බලාපොරොත්තු වෙන දේවල් වලට සම්පූර්ණයෙන් ප්‍රතිවිරුද්ධ දේවල්.

ලැයිස්තුවෙ 10 වෙනියට තිබ්බේ පොදු වැසිකිළි කරාමය. මේ කරාමයෙන් බලාපොරොත්තු වෙන්නෙ වැසිකිළි යාමෙන් පසු අත් සෝදා පිරිසිදු කර ගැනීම. ඒ වුණාට අත් සෝදන්න කලින් අපිරිසිදු අත් වලින් කරාමය අරින්න සිද්ධ වෙනවා. අත් සෝදා ගත්තට පස්සෙ කරාමය වහද්දි ආපහු අත් අපිරිසිදු වෙලා.

ලැයිස්තුවෙ ඊලඟට තිබ්බෙ එක්සත් ජාතීන්ගේ සංවිධානය. එක්සත් ජාතීන්ගේ සංවිධානයේ අරමුණ තමයි ජාතීන් අතර සහයෝගීතාවය ඇති කර ලෝක සාමය රැකීම. ඒ වුණත් දෙවෙනි ලෝක යුද්ධයෙන් පස්සෙ 1945දි එක්සත් ජාතීන්ගෙ සංවිධානය පිහිටුවා ගත්තායින් පස්සෙත් ලෝකෙ පුරා රටවල් අතර යුද්ධ රාශියකුත් ඊට වඩා වැඩි ගණනක් අභ්‍යන්තර අරගලත් ඇති වෙලා තියෙනවා. (ගණන් හිලවු මතක නෑ ) . නිෂේධ බලය පිළිබඳ ප්‍රශ්න හින්දා එක්සත් ජාතීන්ගේ සංවිධානයට සාර්ථකව මැදිහත් වෙන්න පුළුවන් වෙලා තියෙන්නෙ මේවායින් ඉතාම අතළොස්සකට විතරයි .

එක්සත් ජාතීන්ගේ සංවිධානයේ අකාර්යක්ෂමතාවය පෙන්වන අලුත්ම සාක්ෂිය තමයි ශ්‍රී ලංකා ආණ්ඩුවට සහ එල්.ටී.ටී.ඊ සංවිධානයට විරුද්ධව යුධ අපරාධ වාර්තාව. ඒක ඉදිරිපත් කරන්න ක්‍රිකට් ලෝක කුසලානය ඉවර වෙනතුරුම බලන් හිටපු එකෙන්ම පේනවා එක්සත් ජාතීන්ගේ සංවිධානය පොදු වැසිකිළි කරාමයකටත් වඩා අකාර්යක්ෂම බව.

[ 26 - Apr - 2011 ]

සිංගප්පූරුවේ මෝඩ දිනය අද නෙවෙයි හෙට

2011-04-01T04:44:00.001+05:30

ලොව පුරාම ජනතාව ජාති ආගම් භේදයකින් තොරව මහත් සොම්නසින් සමරන ජාත්‍යන්තර මෝඩ දිනය අදයි. හැබැයි මම ඉන්න සිංගප්පූරුවේදිනම් මේ වැදගත් දිනයට පොඩි වෙනසක් වෙලා.

කාර්යාල දිනයක් වෙන අද දිනයේ මෝඩ දින ක්‍රියාකාරකම් වල යෙදීම තහනම් බවත් ඒ වෙනුවට ආසන්නතම සති අන්ත දිනය වන අප්‍රේල් 2වෙනිදා පවුලේ සාමාජිකයන් සහ මිතුරන් සමඟ මෝඩ දිනය සැමරීමට යොදා ගත හැකි බවත් රජය නිවේදනය කරලා තියෙනවා. පසුගිය වසරවල් වල කාර්යාල වේලාවන් තුලදී මෝඩ දින සැමරුම් නිසා සිදුවූ යම් යම් සිද්ධීන් නිසා මේ තීරණය ගත් බවයි කියවෙන්නේ.

ඔබ සැමට සාමය සතුට පිරි

මෝඩම මෝඩ දිනයක් වේවා !!!

[ 01 - Apr - 2011 ]

කොල්ලා, බල්ලා, කෙල්ල සහ පූසා පිළිබඳ අතිවිශේෂ මකර අධිරාජ කොමිෂම

2011-03-23T04:26:00.004+05:30

පහුගිය අවුරුද්දෙ අන්තිම දවස් වල බවුවෙකුටයි මියවුවෙකුටයි පොඩි පොඩි අකරතැබ්බ දෙකකට මුහුණදෙන්න සිද්ධ වුණා. මේ සිදුවීම් දෙකම ආසන්න වශයෙන් එක හා සමාන සිදුවීම් වුණත් ඒ අවස්ථාවන් වලදි බවුවයි මියවුවයි දෙන්නා හැසිරිලා තියෙන්නෙ හාත්පසින්ම වෙනස් ආකාර වලට. එක හා සමාන සිදුවීම් වලදී බවුවා සහ මියවුවා වෙනස් ආකාර වලින් හැසිරීමට හේතුව මොකක්ද කියල හොයල බලන්න ඒ දවස්වලම විමර්ශනයක් කරන්න හිතන් හිටියත් මකර අධිරාජයාගේ කාර්ය බහුලත්වය හින්දා ඒක පොඩ්ඩක් අතපසු වුණා. කොහොම වුණත් මේක තවදුරටත් කල් දාන එක සුදුසු නැති හින්දා ඒ විමර්ශන කටයුත්ත අති විශේෂ මකර අධිරාජ කොමිෂමක් මගින් අද පටන් සිදු කරනු ඇති.

මෙන්න මේ කියන සිදුවීම් දෙකේ සාරාංශය.
========================

මේ කියන බවුවයි මියවුවයි දෙන්නම වලවල් වලට වැටිලා. මියවුවව ගොඩ අරන් තියෙන්නෙ කොල්ලෙක්. බවුවව ගොඩ අරන් තියෙන්නෙ කෙල්ලෙක්. කොල්ලාගෙ පිහිටෙන් ගොඩ ගිය මියවුවා ඒ කොල්ලාට ස්තූතියි කියන්නෙවත් නැතුව පැනල ගියාලු. හැබැයි බවුවනම් කෙල්ලගෙ අතත් ලෙවකාලා හැකි උපරිම ආකාරයෙන් ස්තූතිය ප්‍රකාශ කරාලු.

මේ සිදුවීම් දෙක ගැන සම්පූර්ණ වාර්තා දෙකක් දිනුකගේ සහ චාමිගේ බ්ලොග් වල පළ වෙලා තිබ්බා. මේ තියෙන්නේ ඒ ලිපි දෙක.

1. මියවුවාගේ සිද්ධිය - http://blog.dinuka.com/2010/10/31/post831.htm
2. බවුවාගෙ සිද්ධිය - http://reargate.blogspot.com/2010/11/blog-post.html

මියවුවන්ගේ සහ බවුවන්ගේ මාධ්‍ය ප්‍රකාශකවරුන්ගෙන් මකර අධිරාජ කොමිෂම මේ ගැන අදහස් විමසුවා.

මියවුවන්ගේ මාධ්‍ය ප්‍රකාශක

================

ප්‍රශ්නය:

අදාළ සිද්ධියේදී ස්තූති කිරීමක්වත් කරන්නෙ නැතුව මියවුවා පැනල ගිහින් තියෙනවා. මේ ක්‍රියා කලාපය ඔබ අනුමත කරනවද ?

පිළිතුර :

අපේ මියවුවා ඒ සිද්ධියේදී කටයුතු කරලා තියෙන ආකාරය සම්පූර්ණයෙන්ම අනුමත කරනවා. ඒ වගේම සමාන සිද්ධියකදී බවුවා කටයුතු කරල තියෙන ආකාරය සම්පූර්ණයෙන්ම හෙළා දකිනවා. බවුවා සම්බන්ධ සිද්ධියේදී අත ලෙවකෑම මගින් බවුවා විසින් ඒ තැනැත්තියව බරපතල ජලභීතිකා අවධානමකට ලක් කරලා තියෙනවා. ඒක ස්තූතිය ප්‍රකාශ කිරීමක් කියලා පිළිගන්න බෑ. අපේ මියවුවාගේ සිද්ධියේදී ඒ කියන තැනැත්තාව හූරන්නේ හෝ හපන්නේ නැතුව හැකි ඉක්මනින් ඉවත් වීම තමයි ඉතාම නිවැරදි ක්‍රියා පිළිවෙත. බුද්ධිමත්ව කටයුතු කර මියවුවන්ගේ ගෞරවය ආරක්ෂා කළ අපේ මියවුවාට ස්තූති කරන ගමන් බවුවාගේ වගකීම් විරහිත ක්‍රියා කලාපය නැවත වරක් තරයේම හෙළා දකිනවා. ඔවූඌ ඤාව් !

බවුවන්ගේ මාධ්‍ය ප්‍රකාශක

===============

ප්‍රශ්නය:

මේ සිදුවීමේදී බවුවා කටයුතු කරල තියෙන ආකාරය ඉතාම ප්‍රශංසනීයයි කියල බොහෝ දෙනක් කියනවා. ඒ වුනත් මියවුවන්නම් කියන්නේ බවුවා වගකීම් විරහිතව කටයුතු කළා කියලයි.

පිළිතුර :

මේ සිද්ධියේදී අදාළ බවුවා කටයුතු කරල තියෙන්නෙ ඕනෙම බවුවෙක් කටයුතු කරන සාමාන්‍ය ආකාරයෙන්. එහෙම හැසිරෙන එක සාමාන්‍ය බලු ගතියක්. ඒ බවුවාගේ ක්‍රියාවේ විශේෂ ප්‍රශංශනීයත්වයක් හෝ වගකීම් විරහිත බවක් අපි දකින්න්නේ නෑ.

මේ පිළිබඳව අදහස් විමසන්න මියවුවන්ගේ මහජන පාර්ශවය නියෝජනය කරන ගඩොල් පූසෙක්ව සම්බන්ධ කරගන්න උත්සාහ කළත් ඒ උත්සාහය සාර්ථක වුණේ නෑ.

මේ පිළිබඳව ඔබේ නොමසුරු අදහස් කොමිෂම ඉදිරියේ ප්‍රකාශ කරන ලෙස සි‍යළුම කොල්ලන්, කෙල්ලන් බල්ලන් සහ පූසන් ඇතුළු සියළු සත්වයන්ගෙන්ම මකර අධිරාජයා ඉල්ලා සිටිනවා. ස්තූතියි !

[ 23 - Mar - 2011 ]

එහෙම වුණේ ඇයි ? I Dont Know Why

2011-02-26T23:30:00.003+05:30

අද තරඟය පැවැත්වුනේ

ආර් ප්‍රේමදාස ක්‍රීඩාංගනයේය.

පැරදුනේ ඒකය.

වැරැද්ද ක්‍රීඩාංගනයේ නමය.

සූරියවැව තිබ්බ මැච් එකේදිනම්

මෙහෙම වුණේ නැත.

ප.ලි

===

පකිස්ථානයේත් තියෙන එකේ ලංකාවේත් ඔන්න ඔහේ ගඩාෆි ක්‍රීඩාංගනයක් තිබ්බාට කමක් නැත

මේකත් බලන්න
===========
ජීවිත සෙල්ලම සහ ක්‍රිකට් සෙල්ලම

[ 27 - Feb - 2011 ]

නයි බලපු හැටි

2011-02-23T02:01:00.072+05:30

ඔන්න එකමත් එක අවුරුද්දක පේරාදෙණියෙ විශ්වවිද්‍යාලෙ වෛද්‍ය පීඨයෙන් ප්‍රදර්ශනයක් සංවිධානය කරල තිබ්බා. අපි යාළුවො තුන් හතර දෙනෙකුත් ගියා ඔය ප්‍රදර්ශනේ බලන්න.

ඉංජිනේරු ප්‍රදර්ශන වලනම් එක එක අමුතු අමුතු වැඩ කරන යන්ත්‍ර සූත්‍ර තිබුණට වෛද්‍ය ප්‍රදර්ශනයෙනම් එහෙම නෑ. එකම එක තැනක බැලුම් බෝල යොදාගෙන පෙණහැලි වල ක්‍රියාකාරීත්වය පෙන්වන උපකරණයක් තිබ්බා. ඒ ඇරෙන්න හැම තැනම වගේ තිබ්බේ කපා කොටාපු මිනිස් ශරීර , ඇටසැකිලි වගේ දේවල්. ඉතින් ඔය ප්‍රදර්ශන භාණ්ඩ අපිට වැඩිය හිතට ඇල්ලුවෙ නෑ.

ඔය අතරේ අපිට ආරංචියක් ආවා පණපිටින් නයෝ, ගැරඬියෝ එහෙම ඉන්න සර්ප විමානයක් ප්‍රදර්ශනේට තියල තියෙනව කියල. ඔන්න තියෙනවා බලන්න වටින දෙයක්. අපිත් ඉතින් පාරවල් හොයාගෙන ගියා සර්ප විමානෙ තියෙන පැත්තට.

බුදු අම්මෝ මෙන්න සර්ප විමානෙ බලන්න නයෙක් වගේ දිග පෝලිමක්. විෂ සහිත ජීවී අකෘති තියෙන හින්දා සර්ප විමානෙ බලන්න එක පාරකට ඇතුල් කර ගන්නෙත් සීමිත පිරිසක් විතරයි. පෝලිමත් පැයක් දෙකක් විතර දිග පෝලිමක්. ඉතින් එච්චර දිග පෝලිම ඉඳල බලන්න තරම් වටින දෙයක් තියෙනවද කියල විපරම් කරල බලන්න අපි කට්ටිය පෝලිමට පිටින් ගිහින් සර්ප විමානෙ දොර කිට්ටුවට ගියා. බලලා ඉවර වෙලා එන කෙනෙක්ගෙන් විස්තර අහන්න කියලා හිතාගෙන සර්ප විමානෙන් පිටවෙන දොර ගාවට තමයි ගියේ. සර්ප විමානෙන් පිට වෙන දොර ගාව මුරට හිටියෙ වෛද්‍යවරියන් වෙන්න ඉන්න නංගිලා කට්ටියක්.

අපේ එක යාලුවෙක් එක පාරටම කිවුවා

"නංගි , මේ අපේ යාලුවෙක් ඇතුලෙ ඉන්නවා. පොඩ්ඩක් ඇතුලට යන්න පුළුවන්ද"

"හා හා එන්න එන්න"

ඔන්න අපි පිටිපස්සෙ දොරෙන් සර්ප විමානෙ ඇතුලට ගියා.

"කෝ කවුද යාළුවා ?"

"නෑ නෑ නංගි , මේ නයෙක්"

"නයෙක් ??"

අර නංගි කටත් බාගෙට ඇරගෙන නළලත් රැළි කරගෙන අපි දිහායි සර්පයො දිහායි මාරුවෙන් මාරුවට බලනවා.

"නෑ නෑ, මේ නයෙක් කිවුවෙ නයෙක් , මේ මේ පොඩි නයෙක්, මේ මේ ..... පොඩි බොරුවක් " අපේ යාලුවා පැටලි පැටලි කිවුවා.

ඔන්න එතකොට තමයි අපිටත් තේරුණේ. අපිත් හිතුවෙ කවුරු හරි අරයගෙ යාළුවෙක් ඇත්තටම ඇතුලෙ ඇති කියලා.

"දැන් ඇතුලට ආපු එකේ සර්පයෝ ටික බලලම යන්නං නේද ?"

අර නංගි ඉනට අත් දෙක තියාගෙන අපි දිහා රවල බලාගෙන "හා හා හ්ම්" කිවුවා.

ඔන්න ඔහොමයි යාලු නයෙක්ගෙ මාර්ගයෙන් අපි නයි බැලුවෙ.

"ඇතුලෙ යාලුවෙක් ඉන්නව කියපු ගමන් කිසිම ඇහිල්ලක් බැලිල්ලක් නැතුව අපිව ඇතුලට එක්කරගෙන යයි කියලා මම හිතුවෙ නෑ. මටත් හිතා ගන්න බැරිවුණා මොකද කරන්නෙ කියල."'

නයාගෙ යාලුවා අපිට පස්සෙ කිවුවා.

ප.ලි
=====

නයි අරිනවා කියන එක ගැලපෙන්නෙ මේ වගේ පොඩි බොරුවලට නෙවෙයි. මෙන්න මේ වගේ ඒවට. රංගගේ නයි ඇරිල්ල
සර්පයෝ ගැන විස්තරාත්මකව දැනගන්න . ප්‍රියන්තගේ සර්ප ලිපි පෙළ

[ 23 - Feb - 2011 ]

හා හා හරි හාවෝ ! කැලේ මැදින් ආවෝ !

2011-02-03T01:17:00.011+05:30

මතකයිද දන්නෙ නෑ ගිය අවුරුද්දෙ කොටියා ආපු හැටි. ඒ ආපු කොටියා ආපහු යන්නෙ අදයි. කොටියා වෙනුවට වැඩ බලන්න එන්නෙ හාවෙක්. යන කොටියාට එන හාවාව මුනගැස්සුවෙ මෙන්න මෙ වගේ

තවත් චීන අලුත් අවුරුද්දක් උදා වෙලා. චන්ද්‍ර මාස ක්‍රමයකට අනුව සකස් වෙන චීන කැලැන්ඩරයේ මේ අවුරුද්ද වෙන් කරලා තියෙන්නෙ හාවාට. මේ පාර සැරසිලි වලට හාවො වගෙම හාවන්ගේ ප්‍රියතම ආහාරයක් වෙන කැරට් අලත් යොදාගෙන තියෙනවා. හා මස් තහනමක් සහ කැරට් ප්‍රවර්ධන වැඩසටහනුත් මේ අවුරුද්ද පුරාම ක්‍රියාත්මක වෙනවලු.

ඔබ සැමට සාමය සතුට පිරි

කැරට් බේරෙන

සුබ අලුත් අවුරුද්දක් වේවා !!

පලි :

===

කවුරුත් පුල පුලා බලා සිටින ජලයට අධිපති කළු මකරාගේ අවුරුද්ද උදා වෙන්නෙ 2012 දි. සමහර අයනම් කියනවා 2012 දි ලෝක විනාශයක් වෙනවා කියලා. ඒ වුණත්

දැනට අංශක 23 1/2 ක් වන පෘතුවි අක්ෂයේ ආනතිය අංශක 45 දක්වා වැඩි වීම.
මුහුදේ ගිලී පවතින අත්ලාන්තිස් මහද්වීපය නැවත මතුවීම
බඩු මිල සුළු වශයෙන් ඉහළ යාම

වගේ සුළු සුළු සිද්ධි කීපයක් ඇරෙන්න 2012 අවුරුද්ද සාමකාමීව පවත්වාගෙන යන බවට කළු මකරා මකර අධිරාජයාට පොරොන්දු වුණා.

[ 03 - Feb - 2011 ]

ජනමාධ්‍ය නිදහසට තවත් බාධාවක්

2011-01-19T13:28:00.001+05:30

ජනමාධ්‍ය නිදහසට මේ බාධාව එල්ල වුණේ සිංගප්පූරුවේ උබින් දූපතේදි.

ඔය සිරසෙන්ද ?
කියල තියෙනව නේද මගේ වැයික්කියෙ

ෆොටෝ ගහන්න එන්න එපා කියල.

[ 19 - Jan - 2011 ]

ඌරු මීයා

2011-01-04T08:57:00.002+05:30

මී හරකෙක් කියන්නෙ මීයෙක් වගේ හරකෙක්ට. දිවි මකුළුවෙක් කියන්නෙ දිවියෙක් වගේ මකුළුවෙක්ට. පොල් කුරුමිණියෙක් කියන්නෙ පොල් ගෙඩියක් වගේ කුරුමිණියෙකුට. දඬුලේනෙක් කියන්නෙ කෝටුවක් වගේ ලේනෙකුට

එතකොට ඌරු මීයෙක් කියන්නෙ ?
මෙන්න මේ වගේ එක්කෙනෙකුට.

මැලේ භාෂාවෙන් Tikus කියන්නෙ මීයාට

ජාන විකෘතිතාවයක් නිසා ඌරු මීයෙක් වෙච්ච මේ අහිංසකයාව මට හම්බවුණේ මැලේසියාවෙ KL Tower එක ලඟ තියෙන මිනි සත්තු වත්තෙදි.

[ 04 - Jan - 2011 ]

පූසා ගැන ආසා හිතෙන කතාවක් ?

2010-10-29T05:46:00.003+05:30

මට පහුගිය දවසක තැපෑලෙන් පූසෙක්ව හම්බ වුණා. බූසියක් වගේ පූසෙක්. ඔය උඩ ඉන්නෙ ඒ පූසා තමයි.මේ පූසාව මට එවුවෙ නවෝදා. අර එකමත් එක රටක හිටිය හා පැටියගෙ කතන්දරේ කියල දුන්නෙ එයාට. ආයෙ තව දවසක කොටියෙක්ව පෙන්නුවෙත් එයාටම තමයි.

මගේ බ්ලොග් එකේ පූසල ගැන එක එක කතා ලියලා තියෙනවා දැකලා තමයි ඔය පූසාව එවල තියෙන්නෙ . එයා මට කියනවා ඒ පූසා ගැනත් කතාවක් ලියන්නලු. හෆොයි, මම කොහොමද මේ අඳුරන්නෙවත් නැති පූසලට එක එක කතා හදන්නෙ. ඉතින් මම කිවුවා එයාටම ඒ පූසා ගැන කතාවකුත් හදලා එවන්න, එතකොට මම ඒ කතාව බ්ලොග් එකේ දාන්නම් කියලා. එයත් හා කිවුවා.

මම අද දාන්නම් කියල හිතාගෙන හිටියෙ ඒ පූසගෙ කතාව. ඒ වුණාට ඒ කතාව තවම මඟ එනවා. ඒක නිසා

පූසා ගැන ආසා හිතෙන කතාව

අද පළ නොවේ !!!

අද ඒ වෙනුවට මම මීට කලින් වෙන වෙන පූසල ගැන ලියපු එක එක කතා ටික ඔක්කොම එකම වහලක් යටින් කියවන්න.

පූසලා සම්බන්ධ වෙච්ච ලිපි.

==================

පූසලා ගැන විතරක් නෙවෙයි බවුවෝ , හාවෝ, නයෝ, කුරුල්ලෝ, මී හරකෝ, නරියෝ ඇතුළු විවිධ සත්තු ගැන ලියපු පරණ ලිපි ගොඩක් තියෙනවා. සත්තුන්ට කැමති කට්ටිය ඔය දකුණු පැත්තෙ තීරුවෙ මැද හරියෙ තියෙන ලිපි ගොනුව පොඩ්ඩක් අවුස්සලා බලන්නකො.

[ 29 - Oct - 2010 ]

මනමේ නාට්‍යයේ ඇත්ත කතාව

2010-10-21T20:51:00.005+05:30

හිටපු මනමේ කුමරු

ප්‍රවීණ රංගන ශිල්පී විජය නන්දසිරි

කතන්දර කාරයා මනමේ නාට්‍යය ගැන එක එක කයි කතන්දර කිවුවට පස්සෙ මටත් හිතුණා මනමේ නාට්‍යය ගැන පොඩි රහසක් හෙළි කරන්න ඕනෙ කියලා. මනමේ නාට්‍යය උනන්දුවෙන් බලපු සමහර අයනම් මේ රහස සමහර විට දන්නවත් ඇති.

ඔන්න මනමේ කුමාරයයි මනමේ කුමාරියි තක්ෂිලා නුවරින් පිටත් වෙලා වටපිට සිරි නරඹ නරඹ කැලේ මැදින් යනකොට හදිස්සියෙම වේදිකාව පිටිපස්සෙ ඉඳන් වැද්දො හතර දෙනෙක් කඩා පනිනවනෙ . දන්නවද ඒ වැද්දො ආවෙ කොහේ ඉඳන්ද කියලා? ඒ අය ආවෙත් තක්ෂිලා නුවර ඉඳන්මයි. මනමේ කුමාරයයි කුමාරියි දෙන්න තක්ෂිලා නුවරින් පිටත් වෙනකොටම ඒ වැද්දෝ හතර දෙනත් ඒ පිටිපස්සෙන්ම එන්න පිටත් වුණා.

මතකද මනමේ කුමාරයට කුමාරිව විවාහ කරල දෙන දර්ශනය? අතපැන් වත් කරලා විවාහය කරවන්නෙ දිසාපාමොක් ඇදුරු තුමා. එතන ඉන්නවා නේද මුට්ටි, පැන් කෙණ්ඩි එහෙම අල්ලගෙන දිසාපාමොක්ගේ අතවැසි ශිෂ්‍යයෝ 4 දෙනෙක්. අන්න ඒ හතර දෙනා තමයි වැද්දන් වගේ වෙස්වලාගෙන හදිස්සියෙම කඩා පනින්නෙ. ඒ වැද්දො හතර දෙනා ගිහින් ඔත්තුව දීලා නායක වැද්දෙක්ව එක්කගෙන එනවනෙ. ඒ නායක වැද්දා වෙන කවුරුවත් නෙවෙයි ,ඒ තමයි තක්ෂිලා නුවර දිසාපාමොක් ආචාර්ය තුමා.

මේ කතාව විශ්වාස කරන්න අමාරුනම් ආයෙ මනමේ නාට්‍යය බලනකොට අමතක නොකර සැලකිල්ලෙන් බලන්නකො. නාට්‍යය ඉවර වෙලා නළු නිළියෝ ඔක්කොම වරකට දෙන්න තුන්දෙනා බැගින් වේදිකාව මැදට ඇවිල්ලා ආචාර කරලා පෝලිමක් හදනවනෙ. එතනට දිසාපාමොක් ආචර්යතුමායි මුට්ටි අල්ලපු ගෝලයෝ 4 දෙනයි එන්නෙ නෑ. මොකද ඒ අය දැන් ඉන්නෙ වැදි වේශයෙන් .

දිසාපාමොක් ආචාර්ය තුමාවයි, ගෝලයෝ 4 දෙනයි , වැද්දෝ 5 දෙනෙකුයි ඔක්කොම 10 දෙනෙක්ව නඩත්තු කරන එක නාට්‍ය කණ්ඩායමේ අය වැයට බලපාන හින්දා වෙන්න ඇති මේ ජිල්මාට් එක දාල තියෙන්නෙ. ද්විත්ව චරිත නිරූපණය කියන්නෙත් මේකම තමයි. ටෙලිනාට්‍ය වල , චිත්‍රපටි වල එහෙම කැමරා ප්‍රයෝග යොදාගෙන ද්විත්ව චරිත නිරූපණය කරන අයව එකම දර්ශන තලයකට ගෙනෙන්න පුළුවන් වුණත් නාට්‍ය වල එහෙම බෑනේ. ඒක හින්දා දිසාපාමොක්ටයි ගෝලයෝ 4 දෙනාටයි විශ්ව විද්‍යාල වෙලාවෙන් පස්සේ පාට් ටයිම් වැද්දෝ වෙන්න ඉඩකඩ ලැබෙන විදිහට තමයි නාට්‍ය පිටපතේ ජවනිකා ලියවිලා තියෙන්නේ.

ඔන්න ඕකයි මනමේ නාට්‍යයේ ඇත්ත කතාව.

ප.ලි

===

සිංහබාහු නාට්‍යයේ රඟපාන්නෙත් ඔය කට්ටියම තමයි. සිංහයා තමයි වැදි රජතුමා. මනමේ කුමාරයා ඔළමොළ ගති ඇති සොහෝයුරා වෙනවා

[ 21 - Oct - 2010 ]

හොඳ ළමයා

2010-10-10T15:48:00.005+05:30

වැඩිය කඩන නරක ළමයි

හෙම නොවෙයි අපී

[ 10 - Oct - 2010 ]

අවුල් පාර්ලිමේන්තුව

2010-10-08T21:55:00.023+05:30

කුඤ්චනාද කරනවා කියන්නේ අලියා කෑගහනවා කියන එකට. ඒ වුණාට අශ්වයෙක් කෑගහන එකට කුඤ්චනාද කරනවා කියල කියන්නෙ නෑ. අශ්වයා කෑ ගහන එකට කියන්නෙ හේෂාරවය කරනවා කියල. බවුවොනම් බුරනවා, කුකුල්ලු නම් කෙකර ගානවා, නයාල පිඹිනවා. ගෙම්බලා බක බක ගානවා.

මේ හැම වචනෙකකම අදහස ශබ්ද කරනවා කියන එක වුණාට ශබ්ද කරන්නෙ මොන සතාද කියන එක අනුව යොදා ගන්න වචනෙ වෙනස් වෙනවා. සිංහල භාෂාවෙ විතරක් නෙවෙයි ඉංග්‍රීසි භාෂාවෙත් මේ වගේ වචන තියෙනවා.

විවිධ වර්ග වල සත්තු කණ්ඩායම් හඳුන්වන්න පාවිච්චි කරන ඉංග්‍රීසි වචන ගොඩාරියයි. කූඹි රංචුවක්නම් an army of Ants , මාලු රංචුවක්නම් a school of fish , පූසො සෙට් එකක්නම් a clan of cats, කුරුල්ලෝනම් flock, මුවෝ, හරක් , බැටලුවෝ වගේ අයට herd. හාවොනම් warren එහෙම නැත්තන් nest. නයාලට pit. කිඹුලලට bask. මේ වගේ වචන ගොඩාරියයි (වැඩි විස්තර ).

කොහොම හරි සත්තු අතරින් කණ්ඩායමක් සඳහා වන උත්තරීතරම වචනෙ අයිතිය හම්බ වෙලා තියෙන්නෙ බකමූණලට. බකමූණල රංචුවකට කියන්නෙ A Parliament of Owls කියලා.

මේ තියෙන්නෙ අවුල් පාර්ලිමේන්තුවක්

ඒ කියන්නෙ අවුල් ව්‍යවස්ථාදායකය
එතකොට අර උඩින්ම තියෙන පින්තූරෙ
තනියම ඉන්න බකමූණා කවුද ?

ඒ තමයි අවුල් විධායකය !!!

[ 09 - Oct - 2010 ]

ගම රට එපා වෙන්නෙ ඇයි ???

2010-10-01T16:06:00.006+05:30

අද ළමා දිනේ දවසෙ ළමයි ගැන කතා දෙකක් මතක් වුණා.

ඔන්න එකමත් එක කාලෙක රුසියාවෙ හිටපු ඒකා-අධිපති පාලක ස්ටාලින්ට පොඩි මාධ්‍ය සන්දර්ශනයක් පවත්වන්න හිතුනාලු .මේකට සහභාගි කරව ගත්තේ තෝරාගත් ජනමාධ්‍යවේදීන් සහ ඉස්කෝල වල ළමයි පිරිසක්ලු.

මේ සන්දර්ශනයට පෙරපුහුණුවක් එහෙමත් තිබ්බලු (එහෙම නැතුව බෑනෙ) . තිර පිටපතේ හැටියට ස්ටාලින් අහම්බෙන් යනවා වගේ ළමයි අතරට ගිහිල්ලා එක ළමයෙක්ගෙන් ප්‍රශ්න 2ක් අහනවලු. ඉතින් ඒ ප්‍රශ්න දෙකට උත්තර දෙන්න හොඳ හුරුබුහුටි කොලු පොඩ්ඩෙක්ව හොඳට කටපාඩම් කරවල පුහුණු කෙරෙවුවලු.

ඔන්න මාධ්‍ය සන්දර්ශනය දවසෙ තිර පිටපතේ හැටියට වැඩේ හොඳට නැහල ගියාලු. ස්ටාලින්ගෙ කතාවෙන් පස්සෙලු අර ළමයෙක්ගෙන් ප්‍රශ්න අහන අංගෙ තිබ්බෙ. ඔන්න ඉතින් ස්ටාලින්ගෙ ආරක්ෂකයො ස්ටාලින්ව අර ළමයා ගාවට එක්කන් ගියාලු . ඔන්න ජවනිකාව පටන් ගත්තලු

ස්ටාලින් : පුතාගෙ අම්මා කවුද ?

ළමයා : ( මහා හයියෙන් ) , මගේ අම්මා තමයි සෝවියට් දේශය

ස්ටාලින් : එතකොට පුතාගෙ තාත්තා කවුද ?

ළමයා : ( මහා හයියෙන් ) ජෝශප් ස්ටාලින්

ස්ටාලින්ට හරි සතුටුයිලු. ළමයා හිතුවටත් වඩා හොඳට ජවනිකාව රඟපාපු හින්දා. ඉතින් සතුට වැඩි කමට මේ ළමයට මොකක් හරි තෑග්ගක් දෙන්න ඕනෙ කියල හිතපු ස්ටාලින් ළමයගෙන් තව ප්‍රශ්නයක් ඇහුවලු

ස්ටාලින් : පුතා කැමත්තෙන් බලාපොරොත්තු වෙන මොනව හරි දෙයක් තියෙනවද ?

ඔය ප්‍රශ්නෙට කලින් උත්තරයක් කටපාඩම් කරවල තිබ්බෙ නැහැලු.ඉතින් ඒ ළමයා තමන්ගේ හෘදසාක්ෂියට එකඟව මහා හයියෙන් බෙරිහන් දුන්නලු

ළමයා : මට අම්මයි තාත්තයි දෙන්නම නැති අනාථයෙන් වෙන්න ඕනියෝ.....

======================

ස්ටාලින් ගැන කතාවනම් කවුරු හරි දේශ ද්‍රෝහියෙක් සෝවියට් සමූහාණ්ඩුවේ රජය අපහසුතාවයට පත් කරන්න හදපු බොරු කතාවක් වෙන්න ඇති, ඒත් මේ දෙවෙනි කතාවනම් සකල සිරින් පිරි ශ්‍රී ලංකාවේ එකමත් එක පිටිසර ගමක පුංචි පාසලක ඇත්තටම වෙච්ච සිද්ධියක් කියලා අවුරුදු ගාණකට කලින් පත්තරේක තිබ්බා.

ඔන්න ඒ චූටි පන්තියෙ චූටි ටීචර් චූටි ළමයින්ට මගේ රට ගැන කියල දෙනවලු. ලංකාව තමයි ලෝකෙ උතුම්ම රට, සෞම්‍ය දේශගුණයක් තියෙනවා, ස්වභාවික විපත් නෑ. කෑමෙන් බීමෙන් අඩුවක් නෑ. පළතුරුද, කිරිද, බත්ද, පොල්ද.. ඔය හැම ජාතියකින්ම ලංකාවට කිසිම අඩුපාඩුවක් නෑ.

ඔහොම උගන්නනකොට එක චූටි ළමයෙක් අඬන්න පටන් ගත්තලු. "ටීචර් මම ඊයෙ රෑට කෑවෙත් නෑ, අද උදේට කෑවෙත් නෑ , තේ එකක් විතරයි බිවුවෙ, අනේ ටීචර් මටත් ලංකාවට යන්න ඕනෙ " කියලා

======================

හැබෑටම සමහර අයට මේ විදිහට ගම රට එපා වෙන්නෙ ඇයි. කේන්දරේ එපා කරපු අනං මනං ග්‍රහ යෝග තිබ්බමත් එහෙම වෙනවලු. හැබැයි ඒ මනුස්සයගෙ කේන්දරේද රටේ කෙන්දරේද කියලනම් හරියටම දන්නෙ නෑ.

පලි:

----

කේන්දර ගැන යමක් කමක් දන්න මාරයා වගේ කෙනෙක්වත් ලංකාවෙ තත්කාල කේන්දරේ පොඩ්ඩක් බැලුවනම් මොකද?

[ 01 - Oct - 2010 ]

ඉස්පිලි පාපිලි නොමැති රටක් !!!

2010-09-24T21:03:00.001+05:30

එකමත් එක චූටි ටීචර් කෙනෙක් මට කිවුවා එකමත් එක බබෙක් අකුරු වලට ඉස්පිලි පාපිලි දාන්න කැමති නැහැලු. ඉස්පිලි පාපිලි දාපුවම බෝල වගේ රවුමට තියෙන අකුරු කැත වෙන හින්දලු.

මේ බබා රූල් තියෙන පොත් වල රූල් දෙක අතරෙ ඉඩ පිරෙන්න බෝල ගෙඩි වගේ ලස්සනට අකුරු ලියන්න පුරුදු වෙලා. හැබැයි එහෙම රූල් දෙක අතරෙ ඉඩ පිරෙන්නම ලිවුවට පස්සෙ කෝ ඉස්පිලි පාපිලි දාන්න ඉඩක්.

ඉතින් මම චූටි ටීචර්ට කිවුවා ඩබල් රූල් පොත් වල අකුරු ලියන්න පුරුදු කරන්න කියලා. චූටි ටීචර් කියනවා දැන් ඩබල් රූල් පොත් විකුණන්න තියෙනවා අඩුයිලු. තියෙන ඒවත් තනිරූල් පොත් වලට වඩා ගණන් වැඩිලු. ඒක හින්දා සිංහල භාෂාවත් ඉස්පිලි පාපිලි නැති ඉංග්‍රීසි වගේ භාෂාවක් කරන්න ඕනෙලු.

ඔන්න ඒ චූටි ටීචර්ගෙයි , ඉස්පිලි පාපිලි වලට අකමැති බබාලගෙයි දැන ගැනීම පිණිස මට චූටි කවියක් මතක් වුණා. මේ කවියෙන් කියවෙන්නෙ ඉස්පිලි පාපිලි නැති එකමත් එක රටක වෙච්ච චූටි සිද්ධියක්.

ටකර ටකර ටකර ................ලයා

කළෙත අරන ළඳට..............ගයා

ළඳ වටකර කබර..............ගොයා

කකල කාප....................දයබරයා

පවූඌඌඌඌ නේද ?

[ 24 - Sep - 2010 ]

ශ්‍රේෂ්ඨාධිකරණය ඉදිරියට ගියෙමි

2010-09-23T10:46:00.001+05:30

(පින්තූරය ලොකු කරලා බලන්න පින්තූරය උඩ ඔබන්න)

මේ මම ඉන්නේ සිංගප්පූරුවේ පැරණි ශ්‍රේෂ්ඨාධිකරණය ඉදිරිපිට. අඩවන් වූ දෙනෙතින් බලා ඉන්නවට වඩා එක ඇහැක් සම්පූර්ණයෙන් වහගෙන අනිත් ඇහැ සම්පූර්ණයෙන් ඇරගෙන ඉන්න එක ලේසියි කියලා මට හිතුණා.

[ 23 - Sep - 2010 ]

දහ අට සන්නිය

2010-09-12T09:18:00.004+05:30

නවය නපුරුය.

9 x 2 = දහ අටය.

ඒ නිසා දහ අට දෙගුණයක් නපුරුය.

දහ අට සන්නිය නටන්නේ නපුරු යක්කුන්ව එළවන්නටය.

එළවපු පමණින් යකා නිකංම යන්නේ නැත.

යන යකා යන්නේ කොරහත් බිඳගෙනය.

කොරහ බිඳුනාම වෙන්නේ බරපතල පාඩුවකි.

එවිට හදිස්සියට අත දමන්නට එකක් නැතිවන්නේය.

හදිස්සියට කොරහේ අත දාන්න වෙන්නේ අඬුව තියෙද්දී අත පුච්චා ගත්තාමය.

අඬුව තියෙද්දී අත පුච්චා ගන්නේ මකබාස්ලාය.

මකබාස්ලා ඉන්නේ යකාගේ කම්මලේය.

කම්මල යකාගේ නිසා කොච්චර එලෙවුවත් යකා ආපහු එන්නේ කම්මලටමය.

අන්තිමට නටපු නැටුමකුත් නැත

බෙරේ පලුවකුත් නැත.

හදිස්සියකට අත දමන්නට තිබුණු කොරහේ කෑලිත් නැත
යකා කියපු තරම් කළුත් නැත.

යකාට ආවඩ අයුබෝ වේවා !!!

( H2N2 උණ විකාරයෙන් ලියන ලද්දකි )

[ 12 - Sep - 2010 ]

හිට්ලර් අද සිටියානම් ???

2010-09-06T13:58:00.001+05:30

[ 06 - Sep - 2010 ]

18+ සහ අමුඩය ගැසීම

2010-09-02T20:26:00.004+05:30

මේ දවස් වල හැමෝම වගේ කතා වෙන්නෙ 18+ ගැන. එහෙමත් නැත්තන් 18 වෙනි අණ්ඩුක්‍රම ව්‍යවස්ථා සංශෝධනය ගැන. සමහරු මේ ව්‍යවස්ථා සංශෝධනය ඉක්මනින්ම සම්මත කර ගත යුතු දෙයක් යැයි කියද්දී තවත් සමහරු කතා කරන්නේ මේකට විරුද්ධව. මේ කතාබහ දැක්කම මට මතක් වුනේ ජනප්‍රවාදයේ සුප්‍රකට අමුඩය ගැසීම් දෙකක් ගැන.

ජනාධිපති උන්නැහේගේ දෙවෙනි ධුර කාලය තවම පටන් ගත්තෙත් නැතුව ලබන නොවැම්බර් මාසෙ ඉඳන් අවුරුදු 7ක්ම ගෙඩි පිටින් දෙවෙනි ධුර කාලයක් තියෙද්දි තුන්වෙනි ධුර කාලයක් වෙනුවෙන් 18+ ව්‍යවස්ථාව සංශෝධනය ඉක්මනින් සම්මත කරගන්න හදන එක හරියට අර මුහුද හත්ගවුවක් තියෙද්දි අමුඩය ගැහිල්ල වගේ. 1/3 ක් නැතුව 18+ ට විරුද්ධව කෑ ගහිල්ල හරියට අර අතීසාරයට අමුඩය ගැහිල්ල වගේ.

ඔන්න මමනම් 18+ ට පස්සත් නෑ විපස්සත් නෑ. GSP+ අහිමි වෙලා ඇඟලුම් කර්මාන්තය අනතුරේ වැටිලා තියෙන මෙ වෙලාවෙ අතීසාර වලටයි මුහුදු යන්නයි පාවිච්චියට දේශීය අමුඩ කර්මාන්තයක්වත් පටන් ගනිච්චාවෙ .

[ 02 - Sep - 2010 ]

වෙළඳ දැන්වීම් - ඔබන්න පෙර සිතා බලනු

2010-08-24T19:36:00.002+05:30

මෑතකදී මම දැක්කා කිහිප දෙනෙක්ම අන්තර්ජාලයෙන් මුදල් උපයන ක්‍රම ගැන බ්ලොග් සටහන් ලියලා තියෙනවා. මෙයින් ජනප්‍රියම ක්‍රමයක් තමයි වෙළඳ දැන්වීම් එබීම (Bux Sites) . සමහර අයනම් තමන්ට ඩොලර් කීපයක් (සමහර විට ඩොලර් ශත ගණනක් ) හම්බ වුණා කියලා payment proof පවා දාලා තිබ්බා. මේ ක්‍රමයට මුදල් හොයන්න හිතන අය මෙන්න මේ ප්‍රශ්න වලට උත්තර දුන්නානම්.

1. ඇමරිකානු ඩොලර් එකක් ශ්‍රී ලංකා රුපියල් කීයද ?

2. මාසයකට උපයාගත හැකි මුදල රුපියල් වලින් කීයද?

3. වෙළඳ දැන්වීම් එබීමට මාසයකට ගතකරන විනාඩි ගණන?

4. මාසයකට අන්තර්ජාලය භාවිතා කරන කාලය ?

මෙන්න වැදගත්ම ප්‍රශ්නෙ

5. වෙළඳ දැන්වීම් එබීම සඳහා භාවිතා කරන අන්තර්ජාල සම්බන්ධතාවයේ මාසික ගාස්තුව?

තව බෝනස් ප්‍රශ්නයක් විදිහට කැමතිනම් ලාභ අලාභ ගිණුමකුත් හදන්න.

ඔයිට වඩා හොඳ නැද්ද ඔය Mouse එක විකිණුවානම්. අහල ඇතිනෙ මී කුණක් විකුණලා පොහොසත් වෙච්ච සිටුතුමාගෙ කතාව

[ 24 - Aug - 2010 ]