Thursday, June 25, 2015

ලෝකෙ ලොකුම දූරියන් ගෙඩිය – !!!

දන්නවද?? ලෝකෙ ලොකුම දූරියන් ගෙඩි තියෙන්නෙ සිංගප්පූරුවෙ.මේ දූරියන් කොච්චර ලොකුද කියනවනම් අර එකමත් එක රටක තොවිලයක් නටාපු ලබ්බටත් වඩා මේ දූරියන් ලොකුයි.  දූරියන් ගෙඩි ඔච්චර ලොකුනම් ඒවයෙ ගඳ කොහොම ඇද්ද?  ඒක ඇතුලෙ නටනවා තියා ඒකට කිට්ටු වෙන්නවත් පුළුවන් වෙයිද? වාසනාවකට වගේ මේ දූරියන් ගෙඩි ලොකු වුණාට ගඳනම් නෑ.
.
සිංගප්පූරුවේ “දූරියන් ගෙඩිය” (The Durian) කියන සුරතල් නාමයෙන් හඳුන්වන්නෙ මරිනා බොක්කේ (Marina Bay) තියෙන රංගපීඨ සංකීර්ණය. මේ ගොඩනැගිලි වල වහලය හදල තියෙන්නෙ දූරියන් ගෙඩියක පොත්ත සිහිගන්වන කටු කටු ආකාරයට . මේවා රංගපීඨ හින්දා  මේ දූරියන් ගෙඩි ඇතුලෙ තොවිල් විතරක් නෙවෙයි වෙන වෙන නැටුමුත් නටන්න පුළුවන්.
.
 
මේ තියෙන්නෙ ලෝකෙ ලොකුම දූරියන් ගෙඩි

 කටු කටු වහලය

අර කටින් වතුර  විදින හෙණ ගහපු සිංහයා ඉන්නෙත් මේ කිට්ටුවමයි. කතාවක් තියෙනවා ඒ සිංහයා නොනවත්වාම වමනෙ කරන්නෙ දූරියන් වල ගඳට කියලා.
 
දූරියන් දිහා බලාගෙන වමනෙ දාන සිංහයා

මේ දූරියන් විතරක් නෙවෙයි ඇත්ත දූරියනුත් සිංගප්පූරුවෙ හරිම ප්‍රසිද්ධයි. සිංගප්පූරු ආහාර සංස්කෘතියට දූරියන් කොච්චර බද්ධ වෙලා තියෙනවද කියනවනම් දූරියන් නැති සිංගප්පූරුවක් හරියට අර පරිප්පු නැති හෝටලයක් වගේ වෙයි.   D24,D25 etc… වැනි විවිධ නම් වලින් හඳුන්වන එකිනෙකට වෙනස් රස වලින් යුත් දූරියන් වර්ග රාශියක්ම සිංගප්පූරුවේ තියෙනවා. විශාල ගොඩවල් ගහලා විවිධ වර්ග වල දූරියන් විකුණන තැන් සිංගප්පූරුවෙ හරිම සුලභයි. ඒ තැන් වලම වාඩිවෙලා දූරියන් කන්න මේස පුටු එහෙමත් සකස් කරලා තියෙනවා. සිංගප්පූරු ජාතිකයො පවුල් පිටින් දූරියන් විකුණන තැන්වලට ගිහින් එතනදිම ඒවා රසවිඳිනවා. විකුණන තැන්වලම ඉඳගෙන දූරියන් කන්න පහසුකම් සලස්වා තිබීමට හේතුවක් තියෙනවා. ඒ තමයි පොදු ප්‍රවාහන සේවා වල දූරියන් රැගෙන යාමට ඇති තහනම.
.
 දූරියන් වෙළඳසැලක්

පොදු ප්‍රවාහන සේවා වල දූරියන් ගෙනිච්චොත්
මාසයක් දූරියන් කන මුදල දඩ ගෙවන්න වෙයි
 
ගෙඩි දූරියන් විතරක් නෙවෙයි පැකට් කරපු දූරියන් මදුලු, දූරියන් බිස්කට්, දූරියන් අයිස්ක්‍රීම්, දූරියන් බීම, වේලපු දූරියන්, දූරියන් ජෑම් වගේ දූරියන් ආශ්‍රිත නිෂ්පාදන රාශියක්ම  වෙළඳපොලේ තියෙනවා.  සිංගප්පූරුවට ආවොත් දූරියන් රස විඳින්න වගේම ලෝකෙ ලොකුම දූරියන් ගෙඩි බලන්නත් යන්න අමතක කරන්න එපා.

[ 25 - Jun - 2015 ]

Thursday, June 18, 2015

සර්වසම තුන් නිවුන්නු, එකම මඟක , තුන් ආකාරයකින්


 
එකමත් එක කලක එක්තරා රටක සර්වසම නිවුන්නු තිදෙනෙක් ජීවත් වූහ. එක් දිනක් ඔවුන් තිදෙනා ඉතා දුරු ගමනක් යාමට මඟට පිළිපන්හ.
.
ඔවුන් යා යුතු වූ මාවත පුළුල් එකකි.
.
පළමුවැන්නා ගමන් කළේ මාවතේ දකුණු පැත්තට ආසන්නවය. මාවතේ දකුණු සීමාව ඉතා අලංකාරව තිබිණි. එපස මාර්ගය අයිනේ සිටියෝ බොහෝ විනෝදකාමීහු වූහ. විසිතුරු ඇඳුමින් සැරසුණු සුන්දර කාන්තාවෝ බොහෝ වූහ. රසවත්සහ සුවඳ හමන බොජුන් සහිත ආපන ශාලා බොහොමයක්ද එපස විය.
.
දෙවැන්නා ගමන් කළේ මාවතේ වම් පැත්තට ආසන්නවය. මාවතේ වම්පස බෙහෙවින් අපිරිසිදු විය. දුගඳ හමන කුණුකන්දල් මාවත අයිනේ ගොඩ ගසා තිබුණි. එපස මඟ අයිනේ සිටියෝ වනාහි බොහෝ කලහාකාරී ලෙස හැසිරෙන දරුණු පෙනුමකින් යුක්ත වූවෝ වූහ. 
.
තෙවැන්නා ගමන් කළේ මාර්ගයේ මධ්‍ය රේඛාව සළකුණු කර තිබූ රේඛාව ඔස්සේය. 
.
පළමු වැන්නාට ගමන අතරතුරු නිතරම කුසගිණි දැණුනි. ඔහු නිරතුරුවම රස බොජුන් සහිත ආපන ශාලා වලට ගොඩවිය. මඟ අයිනේ සිටි සුන්දර කාන්තාවන්ගේ වැලඳ ගැනීම් ඉවසීම සඳහාද බොහෝ තැන් වලදී ඔහුට නවතින්නට සිදු විය.
.
දෙවැන්නා නිරතුරුවම ජුගුප්සාජනක ගතියකින් පසුවිය. නිතර අපිරිසිදු වන සිය පාවහන්,ඇඳුම් ආදිය පිරිසිදු කර ගැනීම සඳහා තැන් තැන්වල ඔහුට නවතින්නට සිදු විය. තවත් තැන් වලදී මඟ අයිනෙ සිටියවුන් ඔහුව කලහයට පොළඹවාගැනීම නිසාද ඔහුට නතර වන්නට සිදු විය.
.
තුන් වැන්නාට මාර්ගයේ දකුණු පස හෝ වම්පස සිදුවන දෙවල් වලට අවධානය යොමු කිරීමට තරම් කාලයක් තිබුණේ නැත. මන්දයත් නිරතුරුවම මාර්ගයේ දෙපස මංතීරු වල තමන්ට ඉදිරියෙන් සහ තමන්ට පිටුපසින් එන වාහන වලින් ඔහුට ආරක්ෂා වීමට සිදුව තිබූ බැවිණි.
.
කලක් ගතවිය. මේ වනවිට තුන්වැන්නා ස්වකීය ගමනාන්තයට ගොස් විවේකීව පසු වෙයි. පළමුවැන්නා සහ දෙවැන්නා තවමන් ගමනාන්තය පෙනෙන තෙක්මානයකවත් නැත.

[ 18 - Jun - 2015 ]

Tuesday, June 16, 2015

පූෂෙක් ගැන ආදර්ශමත් කතාවක්


ඔන්න එකමත් එක රටක හිටපු පූසෙකුට පුරු පුරු ගාන්න අදහසක් පහළ වුණා. ඉතින් මේ පූෂා පුටුවක් උඩ හරිබරි ගැහිලා වාඩි වෙලා අල්ලපු ගමටත් ඇහෙන්න හෙණ සද්දෙන් පුරු පුරු ගාන්න පටන් ගත්තා. මෙයා මෙහෙම ගජරාමෙට පුරු පුරු ගගා ඉද්දි ඔය පුරු පුරු නාදය ඇහුණා කාටද දන්නවද ?
....
....
....
අල්ලපු ගමේ හොර පූසිට.
.
පූසි බැලුව අෑ.... කවුද? කවුද? ඒ් පුරු පුරු ගාන්නෙ කියල.හහ් බැලින්නම් අර අල්ලපු ගමේ තඩි පූෂ් ලොක්කා!
.
පූසිට කේන්ති ගිහින් පූස් අධිකරණයෙ පූස් අයිතිවාසිකම් නඩුවක් දැම්මා, තඩි පූෂාගෙ පුරු පුරුවෙන් තමන්ගෙ සුකොමළ නින්දට බාධා වෙනව කියල.
.
පූසා නඩු දවසට කලිංදා නිදාගත්තෙ උදෙං ඇහෙරෙනෝ කියල ටොකු 5ක් ඇනගෙනම ඒත් ?
....
....
                                                                                ....
පූෂා ඇහැරෙද්දි පෂ්ෂ පැත්තට අව්වත් වැටිලලු.
.
පූෂා අත්තනෝමතිකව නඩුවට පෙනී නොසිටි නිසා පූෂාව නැෂ්ටෙන් අල්ලාගෙන එන ලෙස වරෙන්තු නිකුත් වුණාලු.
.
ඔන්න ඕමයි , හොර පූසි නිසා තඩි පූ ගෙ බව්මික අකණ්ඩ තාවය බිඳ වැටුනෙ . ඔවූඌ. ඤාව් ඌ!
.
කතාව නිමි !
.
මේ කතාවෙන් ගන්න පුලුවන් ආදර්ශ මොනවද ?
.
දැනට හඳුනාගෙන තිබෙන ආදර්ශ
.
1.  වැදගත් වැඩකට යන්න කලින් දවසේ රෑවත් අඩුගානේ එලාම් එකක් තියාගන්න ඕනේ කියලා..
 .
2. අසල් වැසියාට ප්‍රේම කරන්න ඕනේ කියලා..
.
3. හිතෙන හිතෙන හම දේම කොරන්න එපා කියල.
.
4. පූසියෙක්ගේ නින්දට කිසිම දවසක බාධා කරන්න එපා කියලා..
.
5. ටොකු 5 ක් ඇනගත්තට උදේ 5ට ඇහැරෙන්න බැහැ කියලා.
.
6. වරදකාර පුසෙක්ට සමාව දෙන්න පූසියක් තියා අධිකරණයක් වත් ලැහැස්ති නැහැ කියලා.
.
7. අනික් අයට කරදර වෙන විදියට පුරු පුරු ගාන්න ඕන පුසෙක් ඉන්නවනම්...ඌගෙ නැට්ට කපල දැමිය යුතු බව...
--- I . අපේ නැට්ට නැති ගරු නගරාධිපති ස්ටබ් පූෂ් මැතිතුමාට නැස්ට නැති වුණේ ඔහොමද දන්නෙ නෑ. ස්ටබ් මැතිතුමා ගැන දනගන්නනම් මේ ලිපිය අරගන්න කියවන්න දැනගන්න ජයගන්න. 
(status-chanaka.blogspot.com/2014/02/blog-post.html)..
--- II. නරි අයිතිවාසිකම් උල්ලංඝනය වන පරිදි කරදරකාරී ලෙස හූඌඌඌ කියමින් හැසිරුණ හා උන්නැහේ කෙනෙක්ගෙ නැෂ්ටනම් නරින් විසින් කපා දැමුණාලු. මෙන්න ඒ කතා පුවත.
(http://status-chanaka.blogspot.com/2012/11/blog-post.html)
.
8. පූසෝ කවුරු කවුරුත් පුරු පුරු ගාන්න පෙර දෙවරක් සිතා බලන එක ඇඟට ගුණ බව ( Aka. ශරීර සෞඛ්‍යයට හිතකර බව).
.
9. පූසා තමන්ගේ ගෙදරට විතරක් ඇහෙන්න පුරු පුරු ගෑ යුතු බව.

10. පස්ස පැත්තට අව්ව වැටෙන තැනක නැතුව මුණට අව්ව වැටෙන තැනක නිදාගන්න ඕන බව. ( මුණට අව්ව වැටුනානම් ඇහැරෙන බැවින්)
.
11. ඉහත 10. පරිදි හැකියාවක් නැතිනම්නැත්තන් පෂ්ෂ උඩ දාගෙන දොයි බබා වෙන්නෙ නැතුව පෂ්ෂ යටට හිටින්න උඩුබැලි අතට දොයි බබා විය යුතු බව. (එවිට අව්ව වැටෙන්නෙ පෂ්ෂට නොව බණ්ඩියට බව කරුණාවෙන් සලකන්න.)
.
12. උත්තල කාචයක් හරහා පෂ්ෂට අව්ව යොමු කළ හැකි ක්‍රමයක් ගැන ශඛ්‍යතා අධ්‍යයනයක් හා පාරිසරික වාර්තාවක් කැඳවිය යුතු බව.
.
13. නිදා ගන්න ඉස්සෙල්ල්ලා විතරක් නෙමෙයි....පුරු පුරු ගාන්න ඉස්සෙල්ලත් පළාතේ ඉන්න හොර පූසියන් ගැන ශඛ්‍යතා අධ්‍යයනයක් කළ යුතු බව.
.
අමතර
A . 13 අසුභ සංඛ්‍යාවක් ලෙස සැළකෙන බැවිත් ඉහත ලැයිස්තුවට ඇතුල් කිරීම සඳහා කතාව තුළින් තව තවත් ආදර්ශ හඳුනා ගත යුතු බව.
.
ලුහුඬු දැන්වීමක්
* ඉහත කතාවේ අවසානය ඛේදාන්තයක් ලෙස නොවී සුඛාන්තයක් වන ලෙස තඩි පූෂා සහ හොර පූෂී අතර I Love You එකක් නිර්මාණය වන පරිදි කතාවේ අවසානය සංස්කරණය කළ හැකි දක්ෂ ලේඛක මහතකු හෝ මහත්මියක් සුප්‍රකට ටෙලිනාට්‍ය නිෂ්පාදකවරයකු විසින් සොයයි. කතාව අවසානය  සංස්කරණය කළ කෙටුම්පතක් සමඟ විමසන්න.
.
ප්‍රභව:
1. https://www.facebook.com/groups/1424625541163441/permalink/1462930467332948/
2. https://www.facebook.com/photo.php?fbid=10153168068522932&set=a.10150512768892932.437808.685407931&type=1
.
[ 16 - Jun - 2015 ]

කැරකෙන රෝදේ





ප්‍රශ්නය : මිනිසා රෝදය භාවිතය ඇරඹුවේ කුමන කාලයේද?
.
පිළිතුරු අංක 1 : රෝදය සොයාගත්ත කාලෙම තමයි
.
පිළිතුරු අංක 2 නෑ. රෝදය සොයාගෙන ටික කාලෙකට පස්සෙලු භාවීතය ඇරඹුවෙ.හොයාගත්තු මුල්ම කාලෙ මේ රවුමෙන් ඇති වැඩක් නෑ කියල පැත්තකට දමල තිබ්බලු.
.
දවසක් ඕක පැත්තකට දමල තිබ්බ තැනින් අරගෙන තවත් පැත්තකට දමන්න යද්දි අත ලිස්සල ගිහින් රෝදය පෙරලි පෙරලි යන්න පටන් ගත්තලු. අන්න එදාලු තේරුම් ගත්තෙ මේ රවුමෙන් යම්කිසි ප්‍රයෝජනයක් තියෙයි කියල.
.
මුලින්ම ගත්තු ප්‍රයෝජනේ තමා රෝදය පෙරලි පෙරලි යන්න සලස්වල විනෝදයක් ලැබීම. ඊට වඩා ඇඩ්වාන්ස්ඩ් ප්‍රයෝජන ගැන අයිඩියාර්ස් පහල වුනේ හවසට හවසට එහෙම රෝද පෙරල පෙරල විනෝද වෙන අතරතුරලු. .
.
උදාහරණයක් විදිහට එකමත් එක දවසක රෝදය පෙරලි පෙරලි යද්දි ඒකත් එක්ක පටලැවිලා අතු කැබැල්ලක් තිබ්බ තැනින් වෙනස් තැනකට ට්‍රාන්ස්පෝට් වුණාලු. අන්න එදා තමා රෝදය ට්‍රාන්ස්පෝට් කටයුතු වලට පාවිච්චි කළ හැකියි කියන අයිඩියාව පහළ වුණේ.
.
රෝදයේ වෙනත් ප්‍රයෝජන ගැන අයිඩියාස් පහළ වෙච්චි ආකාර දන්න/හිතාගන්න පුලුවන් අය ඉන්නවනම් ඒ විස්තරත් කියමු බලන්න ?
.
ප්‍රභවය : https://www.facebook.com/groups/804276106323782/permalink/842692562482136/
.
[ 16 - Jun - 2015 ]

Friday, April 17, 2015

මකරෙකුගේ පිය සටහන්



බ්ලොග් වසන්තය 2015 වෙනුවෙන් අලුතින් මක්කවත් ලියන්න බැයි වුණා. කලින් ලියපු විවිධ ආකාරයේ බ්ලොග් සටහන් කීපයක් සහ ඒවාට ලැබුණු ප්‍රතිචාර එකතු කරලා පුංචි පොත් පිංචක් හැදුවා. රුපියල් 999.00 ක් වටිනා මේ පොත් පිංච බ්ලොග් වසන්තය 2015 වෙනුවෙන් ඔබ සමඟ නොමිලේ බෙදා හදා ගන්න තීරණය කළා.
.
.සාමය සතුට පිරි සුබ නව වසරක් වේවා !!!

https://drive.google.com/file/d/0ByBFH5mADm2udFVFVk9VVHJSd0U/view?usp=sharing

Wednesday, February 11, 2015

හැංගි මුත්තම්

.

හැංගි හූ හූ
ආ වැරදුනා
හැංගි ඤාව් ඤාව්
ඤාව්
 
[ 11 - Feb - 2015 ]

Friday, December 26, 2014

පෙර දළනිඳු දිය කඳ රට බිම් ගලත - 2004 මුහුදු කම්පාවට වසර 10 යි.

.
 
පෙර දළනිඳු දිය කඳ රට බිම්.......... ගලත
සුරකුල හිමි රකිනුව ලක මැවූ............සත
මනකල ඒ සමුදුර පැහැයෙන්...........දිමුත
වඳු සල පිළිම හිමි සිරි සරණ.........සියපත

~ සැළලිහිණි සන්දේශය ~ 

කැළණිතිස්ස රජ සමයේ රහතන්වහන්සේ නමකට කළ අපරාධය නිසා සමුදුර ගොඩ ගැලූ බව සඳහන්. එදා මුහුද ගොඩගැලීම නැවැත්වීම සඳහා ශක්‍ර දෙවියන් පිළිම වහන්සේ නමක් තැන්පත් කළ බව කියවෙනවා.

ඉහත රූපයේ වම්පස ඇත්තේ ශක්‍ර දෙවියන් විසින් වතුර ගලා ඒම නැවැත් වීමට තැබූ බවට විශ්වාස කරන සල පිළිම වහන්සේ . දකුණු පස දැක්වෙන්නේ සක් දෙව් රජ විසින් සල පිලිම වහන්සේ තැන්පත් කරන අයුරු කැළණි විහාරයේ සිතුවමට නගා ඇති ආකාරය.

මහ රහතන් වහන්සේව තෙල් කටාරමකට දැමීම

 කැළණිතිස්ස රජ සමයේ මුහුද ගොඩ ගැලීම


2004 සුනාමි ව්‍යසනයේදී නිරුපද්‍රිතව වැඩ සිටින බුදු පිළිම වහන්සේ නමක්

[ 26 - Dec - 2014 ]

Friday, October 31, 2014

රෝදය

.
දේදුන්නේ පාට හතයි
හතේ සිකුරු මනමාලයි
මනමාලිගෙ සිරියාවයි
සිරියාවේ ගිනි ඇවිලෙයි

සකිය සගව්වට රෝදය කැරකෙනවෝ !!!
හොක්කි හොක්කි හූඌඌඌඌ
 
 
 

[ 31 - Oct - 2014 ]

Tuesday, April 8, 2014

මාර්ක් සකර්බර්ග්ට තෙරුවණ් සරණයි




මාර්තු මස 21 වැනිදාට යෙදුනු ලෝක කවි දිනයට සමගාමීව,සිහල කවි සංගමයේ සහ කෝකිල හඬ පුවත්පතෙහි පූර්ණ අනුග්‍රහය ඇතිව මුහුණුපොතෙහි සඳැස් කවි තරඟයක් පැවැත්වුණා. මුහුණු පොතේ නිර්මාතෘ මාර්ක් සකර්බර්ග් මැතිතුමාට තිසරණ සරණ පතමින් මමත් පුංචි කවි පන්තියක් ඉදිරිපත් කළා.


මෙත් සිත පතුරා සියලු සතුන්.............වෙත
අත් හැර සක්විති මහ රජ ...........,....සම්පත
මර සෙන් පරදා ලැබුවේ බුදු.......... ...නෙත
නමදිමු මුනිඳුන් පහදා බැති..................සිත

සසර කතර ගණඳුර.................. දුරලන්නට
තම නැණ පමණින් පිහිටට............ගන්නට
දෙසුව මුනිඳු දෙව් බඹ මිනිසුන්.............හට
අවසර සිරි සදහම්.....................නමදින්නට

මුනිඳුන් පෑ පිළිවෙත්..................,පුරමින්නේ
සිල් සමාධි ගුණයෙන්,,,,,,,,,,,,,,,,,,දිදුලන්නේ
සිවු දිග මුනි බණ පද...................පතුරන්නේ
තෙවනුව මහ සඟ ගණ...............නමදින්නේ

පෙර කල ලියවුණු පුස් කොළ...........මතුපිට
රස ගුණ අරුතින් පිරි හෙළ..............කවියට
මෙවන් අරුම තැන් සාදා..................දුන්නට
තෙරුවණ් සරණයි සකර්බර්ග්................හට




[ 08 - Apr - 2014 ]

Monday, March 24, 2014

හේතු ඵල දහම - මට තේරෙන හැටියට

මූණු පොතේ සමූහයක මුස්ලිම් නමක් තියෙන කෙනෙක් ප්‍රශ්නයක් අහල තිබ්බා හේතුඵල දහම කියන්නේ මොකක්ද කියලා. ඒ ප්‍රශ්නෙට මගේ අවබෝධයේ හැටියට දීපු උත්තරේ බ්ලොග් එකටත් දාන්න හිතුනා. 

 --------------------------------------------------------------------------------------------------------------

හේතු ඵල දහම හෙවත් පටිච්ච සමුප්පාදය කියන්නෙ බුදුදහමේ තියෙන මූලිකම දෙයක්. බුදු දහමේ හැටියට මේ විශ්වයේ තියෙන එක් දෙයක් හැර අනිත් සියලුම දේ හේතු ප්‍රත්‍ය ඇසුරින් හට ගන්නෙ. මෙතනදී හැම දෙයටම ප්‍රධාන හේතුවක් සහ අතුරු හේතු තියෙනවා. උදාහරණයක් විදිහට අඹ ඇටයක් පැල වීමේදී ප්‍රධාන හේතුව අඹ ඇටය කියල ගන්න පුලුවන්. අතුරු හේතු විදිහට ඒකට අවශ්‍ය හිරු එළිය, පොහොර වගේ අනිත් හේතූන් ගන්න පුලුවනි.යම් දෙයක් ඇති වීමේ ප්‍රධාන හේතු හොයා ඉවත් කළොත් ඒ දේ නැවත ඇති වෙන්නේ නෑ.  

බෞද්ධයන් වන අපගේ අරමුණ තමයි සසර දුක නැති කිරීම හෙවත් නිර්වාණ අවබෝධය. ( නිර්වාණය කියන්නේ දිව්‍ය ලෝකය වගේ තැනක් නෙවෙයි ). දුක් නැති කරන්නනම් ඒ දුක් වලට හේතු අපි තේරුම් ගන්න ඕනෙ.  

දුක් කියන්නේ මොනවද කියල බුදු හාමුදුරුවො විස්තර කරන්නෙ මෙහෙමයි. ඉපදීම, වයසට යාම(ජරාවට පත් වීම ) , ලෙඩ වීම, මරණය, කැමති පුද්ගලයන් හා කැමති වස්තූන්ගෙන් වෙන්වීම, අකමැති පුද්ගලයන් හා වස්තූන් සමඟ එක් වීම, කැමති දේ නොලැබීම. ඔන්න ඔය කාරණා තමයි දුක් හැටියට දක්වල තියෙන්නෙ. අපි අපේ ජීවිත අත්දැකීම් එක්ක බැලුවොත් අපිට විඳින්න වෙන හැම දුකක්ම ඔය කරුණු වලින් එකකට අයිතියි.  

ඔය දුක් සහිත දේවල් අපි හැම දෙනාටම දකින්න, විඳින්න සිද්ධ වෙන නිසා ඒවා දුක් කියල තේරුම් ගැනීමේ ගැනීම පහසුයි. ඊලඟට අපි බලමු මේ දුක් වලට හේතුව. දුක් වලට ප්‍රධාන හේතුව තමා ඉපදීම. ඉපදීමක් සිද්ධ වුණේ නැත්තන් ඔය දුක් සහිත දේවල් වලට මුහුණපාන්න වෙන්නෙ නෑ. ඊලඟට තවත් අඩියක් යටට ගිහින් බලනවා ඉපදීමට හේතුව මොකක්ද කියලා. ඔහොම ඔහොම ගැඹුරට හේතු සහ ඒ හේතු වල ඵල දක්වන ධර්මය තමයි හේතුපල දහම කියන්නෙ. 

හේතු ඵල දහම තේරුම් ගන්න ගොඩක් අමාරු එකක් (මේක හරියටම තේරුම් ගත්ත කෙනා නිර්වාණය අවබෝධ කර ගන්නවා ). හේතු ඵල දහම විස්තර වෙන සූත්‍ර සිය ගණණක් තිබෙනවා. එක් එක් පුද්ගලයන්ගේ තේරුම් ගැනීමේ හැකියාවන් අනුව එක් එක් අවස්ථා වල දේශනා කරපුවා. සමහර තැන් වල අර මම කිවුවා වගේ මතු පිටින් අපිට පෙනෙන ඉපදීම, වයසට යාම, ලෙඩ වීම වගේ දුක් සහිත දේවල් වලින් පටන් අරගෙන ගැඹුරට විස්තර කරනවා. තවත් තැන්වල ගැඹුරින් පටන් අරන් මතුපිට දක්වා විස්තර කරනවා. තවත් සමහර තැන් වල මැදින් පටන් අරන් දෙපැත්තට විස්තර කරගෙන යනවා.  

හේතු පල දහම විස්තර කරන එක ආකාරයක් තමයි මේ 

අවිජ්ජා පච්චයා සංඛාරා - අවිද්‍යාව නිසා සංස්කාර හට ගනී  
සංඛාර පච්චයා විඤ්ඤාණං - සංස්කාර නිසා විඤ්ඤාණය ඇතිවේ.  
විඤ්ඤාණ පච්චයා නාමරූපං - විඤ්ඤාණය නිසා නාම රූප හටගනී.  
නාම රූප පච්චයා සලායතන - නාම රූප නිසා ආයතන හය හට ගනී  
සලායතන පච්චයා ඵස්ස - ආයතන හය නිසා ස්පර්ශය හට ගනී  
ඵස්ස පච්චයා වේදනා - ස්පර්ශය නිසා විඳීම හටගනී  
වේදනා පච්චයා තණ්හා - විඳීම නිසා තණ්හාව හට ගනී  
තණ්හා පච්චයා උපාදාන -තණ්හාව නිසා උපාදාන (බැඳීම) හට ගනී  
උපාදාන පච්චයා භවෝ - බැඳීම නිසා භවය හටගනී  
භව පච්චයා ජාතී - භවය නිසා ඉපදීම ඇතිවේ 
ජාති පච්චයා ජරා මරණ සෝක පරිදේව දුක්ඛ දෝමනස්සං - ඉපදීම නිසා ජරාව, මරණය සෝක වැළපීම් දුක් දොම්නස් සෝ සුසුම් ඇති වන බව පටිච්චසමුප්පාද ධර්මතාවයයි.  

කෙනෙකුට ඇති වෙන්න පුලුවන් තව ප්‍රශ්නයක් තමයි අවිද්‍යාවට හේතුව මොකක්ද කියලා. හැබැයි ඇත්තටම මේවා එකක් අනෙක මත පවතින දේවල්. ඒ කියන්නෙ අවිද්‍යාව නිසා සංස්කාර පවතිනවා වගේම සංස්කාර නිසා අවිද්‍යාව පවතිනවා. ඒක උපමාවකින් පැහැදිළි කරනවනම් මෙහෙමයි. හිතන්න දර කෝටු මිටි 2ක් V අකුර අනිත් පැත්ත හරවල වගේ එකිනෙකට හේත්තු කරලා තියෙනවා. ඒ එක් එක් දර කෝටු මිටිය අනිත් දර කෝටු මිටියට හේත්හු වෙලා නිසයි කෙලින් තියෙන්නෙ. හේතු පල දහමේ එක් එක් කොටස් අතර සම්බන්ධතාවයත් ඒ වගේ.   

තෙරුවණ් සරණයි !!!

----------------------------------------------------------------
//
බුදු දහමේ හැටියට මේ විශ්වයේ තියෙන එක් දෙයක් හැර අනිත් සියලුම දේ හේතු ප්‍රත්‍ය ඇසුරින් හට ගන්නෙ// මේ කොටස ගැන පොඩ්ඩි අහල තිබ්බා කොමෙන්ටුවක. සබ්බේ සංඛාරා අනිච්චා
සබ්බේ සංඛාරා දුක්ඛා
සබ්බේ ධම්මා අනත්තා


මේ දැක්වෙන්නේ බුදුදහමේ මූලික සංකල්පයක් වන ත්‍රිලක්ෂණය. එනම් අනිත්‍ය, දුක්ඛ හා අනාත්ම ස්වභාවය.

සංස්කාර කියන වචනයට විවිධ තේරුම් තියෙනවා. මෙතනදී සංස්කාර ධර්ම ලෙස අදහස් වන්නේ හේතු ප්‍රත්‍යයන්ගෙන් හට ගන්නා සියළුම දේ. ඒ දේවල් වලට පොදු ලක්ෂණ තමයි

1. හට ගැනීමක් තිබීම

2. වෙනස් වෙමින් පැවතීමක් තිබීම
3. නැති වීමක් තිබීම

සංස්කාර ධර්ම වල මේ ස්වභාවය හඳුන්වන්න උප්පාද, තිථි, භංග කියන වචන භාවිතා වෙනවා . එවැනි සංස්කාර ධර්ම සියල්ලම අනිත්‍ය සහ දුක් සහිත දේ ලෙස හඳුන්වනවා


නිර්වාණය සංස්කාර ධර්මයක් නෙවෙයි. එහි හේතු ප්‍රත්‍ය වලින් හටගැනීමේ ,පැවත්මේ හෝ නැති වීමේ ස්වභාවයක් නෑ. එම නිසා නිර්වාණයේ අනිත්‍ය සහ දුක්ඛ ලක්ෂණ නැහැ. නමුත් නිර්වාණයත් අනාත්මයි. එහිත් මමය මාගේය කියා ගත හැකි ස්වභාවයක් නෑ.

ඒ නිසා සබ්බේ සංඛාරා අනිච්චා, දුක්ඛා කියා සියලු සංස්කාර ධර්ම වල අනිත්‍ය සහ දුක්ඛ ස්වභාවය කියනවා. අනාත්ම ලක්ෂණයට නිර්වාණයද ඇතුලත් කර සබ්බේ ධම්මා අනත්තා කියනවා.


[ 24 - Mar - 2014 ]