මට දැනෙනා ලෙසට මහරජ ඉබ්බාය !!!

මේක මේ රජ කාලෙ කතාවක්. සමහර අය අහලත් ඇති ඉතින්.

ඔන්න එකමත් එක මහරජ කෙනෙක් දවසක් ගමනක් යනකොට දැක්කලු පාර අයිනෙ හිටපු ඉබ්බෙක්ව. ඉතින් අපේ මහ රජතුමාලටත් නිකන් ඉන්න බැහැනෙ, එතුමාට හිතුනාලු මේ ඉබ්බාව බළල් අතක් කරගෙන අන්දරේව අපහසුතාවයට පත් කරන්න.ඉතින් අපේ මහරජතුමා කරපු වැඩේ මොකක්ද දන්නවද ? එතුමා කරපු වැඩේ තමයි ඉබ්බා ගැන හොඳවයින් තේරවිලි කවියක් ගොතාගෙන රාජසභාවෙදි ඒක ගායනා කරලා අන්දරේට අභියෝග කළාලු පුලුවන්නම් විසඳන්න කියලා.

මහරජ :

දාර දෙකයි එක නම මුල් කර........................තැනුවා

කොන් හතරයි කනු හතරයි ගෙට...................ඇතුවා

පාර තිහක් ගැසුවත් බියකුත්..........................නැතුවා

තෝරාපන් අද මම මගදී..................................දුටුවා

අන්දරේ හරිම හපනානේ. අන්දරේ පටාස් ගාල උත්තරේ කිවුවලු.

අන්දරේ:

දාර දෙකක් එක මැද එක......................ගැවසීය

වටපිට යන කලට කණු හතරෙන්...............යාය

ගෙට ගිය කළට කිසි බියකුත්...............නැතුවාය

මට දැනෙනා ලෙසට මහරජ.................ඉබ්බාය

මේක අහගෙන හිටපු මහරජතුමාගෙ නිළමේ මණ්ඩලයේ සමහරු කිවුවාලු අන්දරේට තෑගි දෙන්න ඕනෙ කියලා. තවත් සමහර නිළමේවරු කිවුවලු අන්දරේ මහරජතුමාට ඉබ්බා කියලා අපහාස කරපු නිසා අන්දරේට දඬුවම් දෙන්න ඕනේ කියලා. බලන්නකො මේ නිළමේ මණ්ඩලයේ සාමූහික වගකීමක් නැති හැටි විතරක් , නේද?

අපේ මහරජතුමාගෙ නිළමේ මණ්ඩලය ගැනත් නොකිවුවොත් අඩුපාඩුවක්නෙ. ඒකෙ දියවඩන නිළමේවරුද , ජාතිය ගොඩනැගීමේ නිළමේවරුද , අර නිළමේවරුද,මේ නිළමේවරුද මෙකී නොකී හැම ජාතියකම වගේ නිළමේවරු හිටියලු. ගජනායක නිළමේ කෙනෙකුත් හිටියාලු. හැබැයි ඒ නිළමේනම් මහරජතුමාට පොඩ්ඩ්ක් විතර විරුද්ධයිලු. රජ කාලෙ ලෝකෙ හිටපු ලොකූම නිළමේ මණ්ඩලය හිටියෙත් අපේ මහ රජතුමාටලු. සාමුහික වගකීමක් නැත්තෙත් නිළමේ මණ්ඩලය ගොඩාක් ලොකු හින්දනෙ.

ඉතින් අපේ මහරජතුමාට කරුණු කාරණා ටිකක් විතර තේරෙන හන්දා එතුමා කරපු වැඩේ නිළමේ මණ්ඩලයේ අදහස් නොසළකා හැරලා අන්දරේගෙන්ම විමසුවාලු අන්දරේ කියපු පිළිතුරු කවියේ තේරුම.

ඉතින් අන්දරේ කිවුවලු,

"පස්වාන්දහසකට බුදුවන්න මහරජතුමනි. මම ඔබතුමාට අපහාස කරන්න නෙවෙයි ඉබ්බා කියලා කිවුවෙ. ඉබ්බා කියන සතාට බොහොම දීර්ඝ ආයුෂ කාලයක් තියෙනවා. ඉතින් ඔබතුමාට ඉබ්බා කියපු එකෙන් මම වක්‍රාකරව අදහස් කලේ , ආයුබෝ වේවා මහ රජාණෙනි !!!" කියන එක කියලා.

ඉතින් රජතුමාට සතුටු හිතිලා අන්දරේට කවට නිළමේ තනතුර දීලා අන්දරේවත් එතුමාගේ නිළමේ මණ්ඩලයට එකතු කර ගත්තලු.

නිමි.

[ 08 - JUNE - 2009 ]